“هیچ ئەگەرێک نییە بۆ داخستنى فڕۆکەخانە و وەستانى گەشتە ئاسمانییەکان”

SNN

بەڕێوبەرى فڕۆکەخانەى نێودەوڵەتى سلێمانى رایدەگەنێت “بەپێى ئامارەکان و ئەوەى لە جیهاندا دەبینرێت لە ئێستادا کۆرۆناى گۆڕاو بەشێویەکى خێراتر بڵاودەبێتەوە، بۆیە ئێمە لە فڕۆکەخانەى نێودەوڵەتى سلێمانى رێکارە خۆپارێزییەکانمان زیاتر کردووە”.

تاهیر عەبدوڵا، بەڕێوبەرى فڕۆکەخانەى نێودەوڵەتى سلێمانى لە لێدوانێکیدا بە SNNى راگەیاند “حکومەتى عیراق و هەرێم نزیکەى 20 وڵاتى دیارى کردووە کە ناتوانرێت سەفەرى بۆ بکرێت بە تایبەت ئەو وڵاتانەى کە ڤایرۆسەکە تێیدا تەشەنەى کردووە، بەڵام لەو وڵاتانەوە هاووڵاتیانى عیراقى دەتوانن بێنەوە بەمەرجێک بیسەلمێنن کە هاووڵاتى عێراقین و دەبێت پشکنینى تایبەت بە کۆرۆنایان کردبێت”.

وتیشى: “لە نێو فڕۆکەخانەدا رێکارى توند گیراوتە بەر سەبارەت بە خۆپارێزى و هاوکات هیچ گەشتیارێک بەبێ بەستنى ماسک و مەوادى پاکژ کەرەوە رێگا نادرێت بێتە نێو فڕۆکەخانەوە و کارمەندانیش فەرز کراوە بە سەریاندا کە دەبێت رێنماییە تەندروستییەکان جێبەجێبکەن”.

هاوکات ئاماژەى بەوەشکرد “لە ئێستادا هیچ ئەگەرێک نییە بۆ داخستنى فڕۆکەخانە و وەستانى گەشتە ئاسمانییەکان”.