“دەستگیرکراوانى بادینان بۆ نۆیەم رۆژ بەردەوامن لە مانگرتن”
SNN
براى یەکێک لە دەستگیرکراوانى بادینان رایدەگەنێت”دادگا لە هەرێمى کوردستان و بەتایبەت لە دادگایکردنى دەستگیرکراوانى بادینان بە سیاسى کراوە و بڕیارى دادگا لە برى ئەوەى یاساى بێت بڕیارێکى سیاسى بنەماڵەى بوو لەسەر ئەو کەیسە”.
ئەیهان هەرکى، براى یەکێک لە دەستگیرکراوانى بادینان بە snnى راگەیاند: “ئاگادارى دۆخى دەستگیرکراوانى بادینان نین و بەهۆى ئەو سزا نادادپەروەریەى بەسەریاندا سەپێنرا چەند رۆژێکە مانگرتنیان لە خواردن راگەیاندوە و رێگا نادەن بەهیچ جۆرێک سەردانیان بکەین و پارێزەرەکانیان ببینن”.
وتیشى”لە پاش ئەوەى دەنگمان لەسەر ئەو نادادیە بەرزکردوە فەرمانى دەستگیرکردنم بۆ دەرچووە کە من هیچ شتێکم نەکردوە پێچەوانەى یاسا و ئەو فەرمانى دەستگیرکردنەش بۆم دەرکراوە بەهەمان شێوە سیاسیە و چ کات دادگایەکى شەفاف هەبێت ئامادەم بچمە پرۆسەى دادگاى کردن،بەڵام لە ئێستادا بەهیچ جۆرێک و ناچمە بەردەمى دادوەرى حزبى و دڵنیام چارەنوسم لە چارەنوسى هاوڕێکانم باشتر نابێت”.
دیفاع هەرکى، رۆژنامەنوس و چالاکوانى بادینان، بەهەمان شێوە ئەویش فەرمانى دەستگیر کردنى بۆ دەرچووە لە ئێستا لە شارى سلێمانى نیشتەجێیە،دیفاع لە بارەى فەرمانى دەستگیرکردنەکەى بە snnى وت”من نە خاکم فرۆشتووە و نە نەوتم دزیوە و نە جاسوسیم کردوە ئەوەى کە کردومە داکۆکى کردن بووە لە ئازادى و ئازادى رادەربڕین،ئەوان دەیانەوێت زیندانێکى گەورە لە هەرێمى کودرستان بکەن و دەنگى ئازاد کەپ بکەن بۆیە ئێمە ئەو نیگەرانیەمان گەیاندۆتە نوێنەرى ووڵاتان ئەوەش بۆ ئەوان قورسە و هەزم ناکرێت”.
هاوکات ئاماژەى بەوەش کرد”من لە دادگا هەڵنەهاتووم و لە دادگایەکى دادپەروەر راناکەم،بەڵام ئەوەى ئێستا لەو سنورە بەڕێوە دەچێت پێش دادگاى کردن بڕیار لەسەر چارەنوست دەدرێت لە لایەن حزبەوە و پرۆسەیەکى دادگایەکشت بۆ رێکدەخەن،کە خۆى لە خۆیدا سینارێویە و لە بنەمادا پێشتر بڕیار لەسەر چارەنوست دراوە،من ئەو کاتە دەچمە بەردەم دادگا بەتەواوەتى دڵنیابم کە دادگا سەروەر و لە ژێر فەرمانى حزبدا نیە”.
