عێراق راگەیەندراوێکی پێنتاگۆن بەدرۆدەخاتەوە

SNN

دوای ئەوەی پێنتاگۆن رایگەیاند، سەبارەت بە هێرشێکی مووشەکی لە سوریا زانیاری هەواڵگرییان لەگەڵ عێراق تاوتوێ کردووە، وەزارەتی بەرگری عێراق ئەو هەواڵەی بەدرۆخستەوە.
وەزارەتی بەرگری عێراق لە تویتێکدا نوسیویەتی: “قسەکانی وەزیری بەرگری ئەمریکا لەبارەی گۆڕینەوەی زانیاری هەواڵگری لەگەڵ عێراق لەپێش ئەنجامدانی چەند هێرشێکی ئاسمانی ئەمریکا بۆ سەر ناوچەیەکی سوریا تووشی سەرسوڕمانی کردین”.
راشیگەیاندووە: “لەگەڵ ئەوەی رەتیدەکەینەوە کە شتی وا روویدابێت، جەخت دەکەینەوە کە هەماهەنگییەکانمان لەگەڵ هاوپەیمانێتی نێودەوڵەتی سنووردارکراوە بە شەڕی دژ بە داعش و ئەو هەڕەشەیەی کە لەسەر عێراق دروستیکردووە، بە ئامانجی ئەوەی کە پارێزگاری لە سەروەری و یەکپارچەیی خاکی عێراق بکرێت”.
ئەمریکا هێرشی کردە سەر دوو گروپی چەکداری نزیک لە ئێران، لە دێرەزوور کە دەکەوێتە باکووری رۆژئاوای سوریا و هاوسنوورە لەگەڵ عێراق، لەدوای هێرشەکانیش پێنتاگۆن بانگەشەی ئەوەی کرد لەگەڵ عێراقدا زانیاری هەواڵگریان گۆڕیووەتەوە، وتیشی “هێرشەکان لە تۆڵەی ئەو هێرشە مووشەکیانەبوون کە کرانەسەر هەولێر و بەغدا”.