سەرۆکی پێشووی ئەمریکا تۆڕێکی کۆمەڵایەتی نوێ دروستدەکات

SNN

وتەبێژی سەرۆکی پێشووی ئەمریکا رایگەیاند: ترەمپ تۆڕێکی کۆمەڵایەتی دروستدەکات و پێشبینی دەکرێت ملیۆنان بەکارهێنەری هەبێت.

دوای ئەوەی هەژماری ترەمپ لە سۆشیال میدیا سانسۆری خرایەسەر، جەیسن میڵەر وتەبێژی دۆناڵد ترەمپ بە کەناڵی فۆکسنیوزی راگەیاند: ترەمپ لە یەک بۆ دوو مانگی داهاتوودا دەگەڕێتەوە بۆ تۆڕە کۆمەڵایەتییەکان ئەوەش لەرێگەی تۆڕێکی کۆمەڵایەتی تایبەت بە خۆی.

وتیشی: ئامانج لە تۆڕە کۆمەڵایەتیەکە ئەوەیە دەیان ملیۆن بەکارهێنەر بۆ خۆی رابکێشێت و پێشبینی دەکرێت ببێتە یەکێک لە پڕبەکارهێنەرترین تۆڕە کۆمەڵایەتیەکان.

وتەبێژەکەی ترەمپ وتی: ژمارەیەک کۆمپانیا پەیوەندییان پێوەکردووە و ئێستا ترەمپ لە گفتوگۆدایە لەگەڵ تیمەکان بۆ دروستکردنی تۆڕەکۆمەڵایەتیەکە.

سانسۆرکردنی هەژماری ترەمپ لە تویتەر دوای ئەوەهات کە گومانی خستەسەر ئەنجامی هەڵبژاردنی سەرۆکایەتی ئەمریکا و بەهۆی قسەکانیەوە لایەنگرانی هەڵیانکوتایەسەر بینای کۆنگرێس و زیانی ماددیان پێگەیاند.