فڕۆکەی بێفڕۆکەوان بیرە نەوتییەکانی سوریا بۆردوماندەکات

SNN

روانگەی سوریی بۆ مافەکانی مرۆڤ رایدەگەیەنێت “ئەمڕۆ دووشەممە فڕۆکەی بێفڕۆکەوان ژمارەیەک بیرە نەوتی سوریای بۆردومانکردووە کە لەژێر کۆنترۆڵی ئێرانییەکاندایە لە ناوچەی بوکەمالی سەر سنوور لەگەڵ عێراق”.

ئەو بیر و کێڵگە نەوتییانە پێشتر لەلایەن چەکدارانی داعشەوە تێکدرابوون، بەڵام بەمدواییانە دووبارە نۆژەنکرابوونەوە بۆ بەکارهێنانەوەیان.

روانگەکە ئاماری کوژراو و بریندارانی دەستنەکەوتووە، چونکە وەکخۆی دەڵێت “ئەو ناوچەیە لەژێر دەستی ئێراندایە و گەنجی ناوچەکەش پڕچەک کراون بۆ پاراستنیان تا دەگاتە شاری حمس”.

ماوە ماوە ناوچەی بوکەمال لەسەر سنووری سوریا و عێراق لەلایەن فڕۆکەی بێفڕۆکەوانی ئەمریکییەوە بۆردوماندەکرێت بەبیانووی بوونی گروپی چەکداری و میلیشیاکانی سەربە حەشد و ئەنساروڵا و حیزبوڵا.