قەیس خزعەلی داوای هەڵوەشاندنەوەی رێککەوتنەکەی شنگال دەکات

SNN

ئەمینداری گشتی عەسائیبی ئەھل حەق داوای هەڵوەشاندنەوەی رێککەوتنی شنگال دەکات و بە پڕوپاگەندەی هەڵبژاردن ناوی دەبات لەنێوان هەولێر و بەغدادا.

قەیس خزعەلی لە تویتێکدا نووسیوێتی: “ئەو رێککەوتنە کە لەنێوان حكومەتی هەرێم و حكومەتی عێراق کراوە، پێچەوانەی بەرژەوەندی ئێزدییەكانە و پێویستە هەڵبوەشێنرێتەوە”.

لە درێژەی تویتەکەیدا خزعەلی ئەوەشی نووسیوە “رێككەوتنەکە گرێبەستێکی سیاسییە بۆ هەڵبژاردنەكان و لەسەر حسابی ئێزدییەكان هاتووەتە ئاراوە و بەردەوامی ئەو گرێبەستەش بە مانای ئەوە دێت دۆخی قەزاکە بگەڕێتەوە بۆ ئەو دۆخەی پێشتر بەسەریدا هاتبوو”.

هەڕەشەی ئەوەشدەکات کە گەر رووبەڕووبوونەوەی چەکداری روو بدات، لۆمەی کەس نەکرێت و گلەیی نەکرێت، وەکخۆی دەڵیت “گەر ئەوەش روویدا، ئەوە لە بەرژەوەندی ئەردۆغانە”.

رۆژی 10ی مانگی 10ی ساڵی پار حکومەتی عێراق و هەرێمی کوردستان دەقی رێککەوتنەکەی نێوانیان لەبارەی شنگال بڵاوکردەوە و تێیدا هاتووە، حکومەتی فیدراڵی ئیدارەی پرسی ئەمنی شارەکە دەکات و دەبێت کۆتایی بە بوونی پەکەکە و هەموو ئەو گرووپانە بێت کە پەیوەندییان پێوەیەتی.