دادگای تورکیا بڕیار لەسەر داخستنی (هەدەپە) دەدات

SNN

ئەمڕۆ سێشەممە، ئاژانسی هەواڵی ئەنادۆڵ بڵاویکردەوە، بڕیارە سبەی دادگای دەستووری تورکیا یەکەم دانیشتن لەسەر دۆسیەی داواکاریی داخستنی پارتی دیموکراتی گەلان (هەدەپە) بۆ بڕیاردان لەسەر قبوڵکردن یان قبو نەکردنی سکاڵانامەکە ئەنجامبدات.

ئاژانسی هەواڵی ئەنادۆڵ لە راپۆرتێکیدا باسی لەوەکردووە، ئەو نوسەرەی دادگا کە ئەرکی خوێندنەوەی دۆسیەکەی پێبەخشرابوو، راپۆرتێکی لەسەر دۆسیەکە ئامادەکردووە و پێشکەش بە دەستەی دادگای دەستووریی کردووە.

ئەو ئاژانسە تورکییە ئەوەشی خستووەتەڕوو، لە ئەگەری پەسەندکردنی سکاڵاکەدا، ئەوا بە مەبەستی بەرگری لەخۆکردن بۆ هەدەپە دەنێردرێت و پێویستە ئەو پارتە لەو ماوەیەدا کە دادگا بۆی دیاریدەکات، بەرگری لەخۆکردن ئەنجامبدات، داخستن یاخود بڕینی بەشە بودجەی پارتەکە پێویستی بە بڕیاری 10 ئەندام لە کۆی 15 ئەندامی لیژنەی دادگای باڵای دەستووریی هەیە و دواتریش، بڕیارەکە بە هەدەپە رادەگەیەندرێت و لە رۆژنامەی فەرمیشدا بڵاودەکرێتەوە.

پێشتریش، جێگری سەرۆكی فراكسیۆنی پارتی داد و گەشەپێدان (ئەکەپە) لە پەرلەمانی توركیا رایگەیاند، لەگەڵ هاوپەیمانەكانیان کاردەكەن بۆ داخستنی پارتی دیموکراتی گەلان “هەدەپە.”

ئەم هەوڵەی دادگاش لەکاتێکدایە، ماوەیەکە لە توركیا هەوڵێک هەیە بۆ داخستنی پارتی دیموکراسی گەلان (هەدەپە)، لەلایەن پارتەکەى رەجەب تەیب ئەردۆغان سەرۆککۆماری تورکیا و هاوپەیمانەکەی پارتی نەتەوە پەرستی ئەو وڵاتەوە.