هاوسەرۆکانی یەکێتی و قوباد تاڵەبانی سەردانی د.بەرهەم-یان کرد

SNN

هاوسەرۆکانی یەکێتی و جێگری سەرۆکی حکومەتی هەرێمی کوردستان سەردانی د.بەرهەم ساڵح سەرۆککۆماری عێراقیان کرد، چەندین پرسیان تاوتوێ کرد لە نێویشیاندا پەسەندکردنی بودجەی گشتی عێراق.

ئەمڕۆ بافڵ تاڵەبانی و لاهور شێخ جەنگی هاوسەرۆکانی یەکێتی و قوباد تاڵەبانی جێگری سەرۆکی حکومەتی هەرێم لە ناوچەی گەشتیاریی مێرگەپانی شاری سلێمانی سەردانی د.بەرهەم ئە‌‌حمەد ساڵح، سەرۆککۆماری عێراقیان کرد. لە دیدارەکەیاندا بیروڕایان ئاڵوگۆڕ کرد دەربارەی دوا پێشهاتە سیاسی و ئابورییەکانی عێراق و هەرێمی کوردستان بە تایبەت مەسەلەی پەسەندکردنی بودجەی گشتیی عێراق و جێگیرکردنی پشکی کورد لەو بودجەیەدا.

لە سەردانەکەیاندا سوپاسی هەوڵ و هەنگاوەکانی دکتۆر بەرهەم ساڵحیان کرد کە ڕۆڵێکی نیشتیمانی و یەکلاکەرەوەی بینی لە لێکنزیککردنەوەی بیروبۆچوونە جیاوازەکان و پەسەندکردنی پڕۆژەیاسای گشتیی بودجەی عێراق لە ئەنجوومەنی نوێنەران و جێگیرکردنی پشکی هەرێمی کوردستان لەو بودجەیەدا.

هەروەها جەختیان کردەوە کە پەسەندکردنی بودجە هەنگاوێکی گرنگە بە ئاڕاستەی باشترکردنی ژیان و گوزەرانی خەڵک و کۆتاییهێنان بە لێبڕینی مووچەی مووچەخۆرانی هەرێم و بوژاندنەوەی کەرتی ئابووری، دوپاتیان کردەوە کە پابەندبوون بە یاسای بودجە دەبێتە مایەی سەقامگیری ئابووری و کۆتاییهێنان بەو کێشە داراییانەی کە ماوەیەکی زۆرە بەرۆکی خەڵک و موچەخۆرانی گرتبوو.