هەمواری یاسای خانەنشینی هێزەکانی ئاسایشی ناوخۆ ئامادەیە و بەمنزیکانە دەگاتە پەرلەمان

SNN

سەرۆکی لیژنەی ناوخۆ و ئاسایش و ئەنجوومەنە خۆجێییەکان دەڵێت: “هەمواری یاسای خانەنشینی هێزەکانی ئاسایشی ناوخۆ ئامادەیە و بەمنزیکانە دەگاتە پەرلەمان” ئاشکراشیدەکات کە پرۆژەیاساکە لە بەرژەوەندیی ئەواندایە”.

لە ئێستادا کارمەندی پۆلیس لە پاش خانەنشین بوونی بڕێکی زۆر کەم لە مووچەکەی بۆ دەبڕدرێتەوە کە 80٪ی مووچەی بنەڕەتییەتی و لەنێوان 200 بۆ 230 هەزار دیناری بۆ دەردەچێت کە چارەگێکی مووچەی کاتی ئەرکی نییە.

شاخه‌وان رەئوف سەرۆکی لیژنەی ناوخۆ و ئاسایش و ئەنجوومەنە خۆجێییەکان لەپەرلەمانی کوردستان بۆ SNN ئاشکرایکرد “ماوەی ساڵێکە ئەوان لەگەڵ وەزارەتی ناوخۆ سەرقاڵی گەڵاڵەکردنی پرۆژەیاسای خانەنشینیی هێزەکانی ناوخۆ و ئاسایشن و لەئێستادا لە ئەنجوومەنی وەزیرانە”.

وتیشی: “پاش گەیشتنی بە پەرلەمانی کوردستان، ئێمە دیراسەی دەکەین و ئەوەی لە بەرژەوەندی پۆلیس و ئاسایش بێت ئەوە دەکەینە یاسا” و دڵنیاییشیدا کە “پرۆژەکە دۆخی خانەنشینانی ئەو توێژە باشتر دەکات”.

ئاشکراشیکرد کە ئەوە یەکلا بووەتەوە کارمەندی پۆلیس بە 15 ساڵ خزمەت و 45 ساڵ تەمەنەوە خانەنشین دەکرێت، بەڵام رێژەی بڕینەوەی مووچەکەی کە ئایا 60٪ بێت یان 80٪ ی کۆی مووچە و دەرماڵەکان بێت، هێشتا ئەوە یەکلا نەبووەتەوە.

سەرۆکی لیژنەی ناوخۆ و ئاسایش و ئەنجوومەنە خۆجێییەکان دەشڵێت “کەمترین مووچەی خانەنشینی هێزەکانی ناوخۆ و ئاسایش لەمەولا لە 400 هەزار دینارەوە دەستپێدەکات”.