بە بڕى زیاتر لە 80 ملیۆن دینار پڕۆژەى خزمەتگوزارى لە دوکان جێبەجێ دەکرێت

SNN

وەزارەتی شارەوانی و گەشتوگوزار رایگەیاند، بە گوژمەی زیاتر لە 80 ملیۆن دینار، پڕۆژەی ئاو و ئاوەڕۆ و كاری كۆنكرێتكردن بۆ چەند كۆڵان و شەقامێكی گەڕەكی فەرمانبەران لە دوكان.

وەزارەتی شارەوانی و گەشتوگوزار لەراگەیەندراوێکدا بڵاویکردەوە: بە گوژمەی زیاتر لە 80 ملیۆن دینار، پڕۆژەی ئاو و ئاوەڕۆ و كاری كۆنكرێتكردن بۆ چەند كۆڵان و شەقامێكی گەڕەكی فەرمانبەران لە دوكان بە چەند قۆناغێك جێبەجێ دەكرێت، كە بەڕێوەبەرایەتیی گشتیی شارەوانییەكانی سلێمانی و سەرۆكایەتیی شارەوانیی دوكان سەرپەرشتی و چاودێریی جێبەجێكردنی پرۆژەكە دەكەن.

ئاماژەی بەوەشکردوە: لە قۆناغی یەكەمی پرۆژەكەدا پرۆژەی دانانی ھێڵی ئاوەڕۆی سەرەكی و دانانی ھاوبەشی ھێڵی ئاوەڕۆ بە ڕوبەری 500 مەتر بۆ ئەو خانوانەی دەكەونە سنوری پڕۆژەكەوە.

بەپێى راگەیەنراوەکەى وەزارەتى شارەوانى، لە قۆناغێكی دوەمی پرۆژەكەدا دەست دەكرێت بە كاری تێكەڵەڕێژكردن بە ڕوبەری 2800 مەتر دوجا، لە قۆناغی كۆتاییشدا دەست دەكرێت بە كاری كۆنكرێتكردن و دروستكردنی شۆستە بە ڕوبەری 1800 مەتر چوارگۆشە كە كێشەی ئاوەڕۆ و ھاتوچۆی گەڕەكی فەرمانبەران چارەسەر دەبێت كە ئەمەش دەبێتە هۆی بوژانەوەی دوكان لە ڕوی خزمەتگوزارییەوە.