چیرۆکى ژنێک لەدواى پرۆسەى ئەنفالەوە 33 ساڵە بە تەنها دەژی

SNN

عەرجان ئیبراهیم دایکى چوار منداڵ بووە، بەڵام لە پرۆسەى ئەنفالدا هەر چوار منداڵەکەى بە بەرچاویەوە ئەنفال دەکرێن و بۆ هەتاهەتایە دادەبڕین لەیەکتر.

پوورە عەرجان، تەمەنی 78 ساڵە و لە ناحیەى ڕزگارى سەربە قەزاى کەلار لە خانووەیەکى تاریک و وێراندا 33 ساڵە بە تەنها دەژێت.

جگە لە 4 کوڕەکەى لە نێو بنەماڵەکەیدا زیاتر لە 80 کەس بەر شاڵاوى ئەنفال کەوتوون، بە هەمان شێوە خۆشى بەر شاڵاوى ئەنفال کەوتووە و زیاتر لە 3 مانگ لە زیندانەکانى نوگرە سەلمان ماوەتەوە، هێشتا ئەو وێنانەى لە بەر چاوە کە چۆن مامەڵەیان لەگەڵ دەکردن.

دەڵێت: “دەیان کەسم بیینى لە نێو زیندانەکەدا دەمردن و دواتر فڕێیان دەدایە نێو لمە ڕەشەکەى بیابان و لەوێشەوە سەگەکان دەهاتن پەلامارى لاشەکانیان دەدا و دەیانخواردن، ئەو دیمەنانەم هەرگیز بیرناچێتەوە”.

ئەو هێشتا چاوەڕوانى جگەر گۆشەکانێتى و هیوا دەخوازێت ئەگەر ئێسک و پروسکیشیان ماوە بهنرێنەوە، چونکە ئەوە دەبێتە تاکە سەبوورى 33 ساڵ چاوەڕوانییەکەى.

پرۆسەى ئەنفال لە سەر دەستى ڕژێمى بەعس و لە ساڵى 1988 بە قوناغ بۆ لە ناو بردنى گەلى کورد دەستى پێکرد کە بە هۆیەوە زیاتر لە 182 هەزار کەس ئەنفال کران .