جەمیل بایک: گفتوگۆمان لەگەڵ ئەمریکادا هەیە

SNN

جەمیل بایک هاوسەرۆکی دەستەى بەڕێوەبەری کۆما جڤاکێن کوردستان (کەجەکە) رایدەگەیەنێت: “پەکەکە بەشێوەیەکی ناڕاستەوخۆ گفتوگۆی لەگەڵ ئەمریکادا هەیە و لە رێگەی هێزەکانی رۆژئاوا و شەنگالەوە پەیاممان لەگەڵ ئەمریکا ئاڵوگۆڕکردووە”.

ناوەندی ریسپۆنسبل ستەیتکرافت، کە لە واشنتنی پایتەختی ئەمریکایە، لە رێگەی ماڵپەڕەکەیەوە ئەو چاوپێکەوتنەی لەگەڵ بایک بڵاوکردووەتەوە کە ئەوەش ئاشکرادەکات: “پەکەکە نامەی بۆ سەرجەم سەرۆکەکانی ئەمریکا ناردووە ئەوەش لە رێگەی چەند نێوەندگرێکی جیاوازەوە”، دەشڵێت: “هەندڵیک لە باڵەکانمان لەگەڵ بەرپرسانی ئەمریکی کۆبوونەتەوە بەڵام لەسەر ئاستی ناوخۆیی”.

لەبارەی ناوەڕۆکی کۆبوونەوەکان، بایک وتوویەتی: “پێدەچێت ئەمریکییەکان ویستبێتیان بیروبۆچوونی ئێمە بزانن”، بەبێ ئەوەی هیچی دیکە لەوبارەیەوە ئاشکرابکات.

بەگوێرەی بەدواداچوونەکانی ریسپۆنسبل ستەیتکرافت کۆبوونەوەیەکی نێوان پەکەکە و ئەمریکا لە تشرینی یەکەمی ساڵی رابردوو ئەنجامدراوە.

سەبارەت بە بەڕێوەچوونی ئەو گفتوگۆیانە، فەرماندەیی فەرماندەی ناوەندی ئەمریکا کە بەرپرسە لە چالاکی هێزەکانی ئەمریکا لە رۆژهەڵاتی ناوەەڕاست بە تەواوی رەتیکردەوە روویدابێت، رائدێکی فەرماندەییەکە بە ماڵپەڕەکەی وتووە: “ئێمە بەشدارنەبووین لەو جۆرە کۆبوونەوانە و بێ ئاگاین لێی”.

ئەمە لەکاتێکدایە دوێنێ جارێکی دیکە وەزارەتی دەرەوەی ئەمریکا بەبیر خەڵکی هێنایەوە کە بڕی چوار ملیۆن دۆلار دیاریکراوە بۆ هەرکەسێک کە زانیاری لەسەرر بایک ئاشکرابکات.