پۆليسی ڕاپەڕين وردەکاری رووداوەکەی چوارقوڕنەی بڵاوکردەوە

SNN

پۆليسی ڕاپەڕين وردەکاری رووداوەکەی چوارقوڕنەی خستەڕوو رايگەياند: “ئەو کەسەی کوژراوە تەمەنی 35 ساڵە و وشوێنەواری فيشەک بە جەستەيەوە بووە”.

بەڕێوبەرايەتی پۆليسی ڕاپەڕين لە راگەيەندراوێکدا بڵاويکردەوە: “کاتژمێر 6:35 خولەکی ئێوارەی ئەمڕۆ تەرمی کەسێک بەناوی (آ،م،ب) لەدایکبووی ساڵی 1987 ڕەگەزی نێر پیشەی پۆلیس لە بەڕێوەبەرایەتی پۆلیسی دارستان و ژینگەی ڕاپەڕین-بنکەی پۆلیسی دارستان و ژینگەی ژاراوە، دانیشتوی ناحیەی چوارقوڕنە کۆڵێن سیتی گەیەندرایە پزیشکی دادوەری ڕانیە کە شوێنەواری فیشەک بەجەستەیەوە بوو، دوای ئەنجامدانی توێکاری رادەستی کەسوکاری کرایەوە”.

راشيگەياند: ” دوای ئەوەی هێزەکانی پۆلیسی لە ڕانیە و چوارقوڕنە ئاگادار کرانەوە بە بوونی رووداوێکی تەقەکردن لە ناحیەی چوار قوڕنە، لەگەڵ گەیشتنی هێزەکانمان بۆ شوێنی ڕووداوەکە تەقەکەرەکان رایانکردبوو بۆ شوێنێکی نادیار، چەند قەوانێکی تەقیوی جۆری چەکی کڵاشنکۆف و دەمانچە لە شوێنی رووداوەکە دۆزرانەوە و دەستیان بەسەردا گیراوە “.

ئاماژەی بەوەشکردووە: “بە وتەی خێزانی کوژراوەکە ئێوارەی ئەمڕۆ پێش خۆرئاوابوون لە نزیک ماڵەکەی خۆیان لە ناحیەی چوارقوڕنە لەلایەن چەند کەسێکەوە دەسڕێژی گولەی کرایە سەر و بەوهۆیەوە گیانی لەدەستداوە”.

پۆليسی راپەرين دەشڵێت ” رووداوەکە دادوەری لێکۆڵینەوەی لێ ئاگادارکرایەوە و مەلەفی لێکۆڵینەوەی بۆ کراوەتەوە و فەرمانی دەستگیرکردن بۆتەقەکەرەکان دەرچووە، بەپێی ماددەی 406 لە یاسای سزادانی عێڕاقی و لێکۆڵینەوەکان بەردەوامە”.