بەرهەم ساڵح لەگەڵ بەشێک لە لایەنە سیاسییەکان کۆدەبێتەوە
بەرهەم ساڵح
SNN
بەرهەم ساڵح سەرۆککۆماری عێراق بە یاوەری قوباد تاڵەبانی جێگری سەرۆکی حکومەتی هەرێم لەگەڵ بەشێک لە لایەنە سیاسییەکان بە جیا لە هەولێر کۆبوونەوە و سبەینێش لەگەڵ هەردوو هاوسەرۆکانی یەکێتی کۆدەبنەوە.
بەرهەم ساڵح سەرۆککۆماری عێراق بە یاوەری قوباد تاڵەبانی جێگری سەرۆکی حکومەتی هەرێم لەگەڵ مەکتەبی مەکتەبی سیاسی یەکێتی و نێچیرڤان بارزانی سەرۆکی هەرێم، مەسرور بارزانی سەرۆکی حکومەت و مەسعود بارزانی سەرۆکی پارتی، عەلی باپیر سەرۆکی کۆمەڵەی دادگەری و سەلاحەدین بەهائەدین، ئەمینداری گشتیی یەکگرتوو کۆبووەوە و بەیانیش دێتە سلێمانی و لەگەڵ هاوسەرۆکانی یەکێتی کۆدەبێتەوە.
حەسه‌ن جیهاد وته‌بێژی سه‌رۆککۆماری عیراق رایگه‌یاند له‌و کۆبوونه‌وانه‌دا دواپێشهات و گۆڕانکاریه‌کانی گۆڕه‌پانی سیاسی عیراق و هه‌رێمی کوردستان گفتوگۆیان له‌باره‌وه کرا و ته‌ئکید له یه‌کخستنی هه‌وڵ و تواناکان کرا به‌ئاراسته‌ی چاره‌سه‌رکردنی کێشه‌و ناکۆکیه‌کان و هێنانه‌دی یه‌کڕیزی نیشتمانی که خزمه‌تی سه‌رجه‌م عیراق و هه‌رێمی کوردستان بکات.
له درێژه‌ی لێدوانه‌که‌یدا حه‌سه‌ن جیهاد ئاماژه‌ی به‌وه‌شدا له کۆبوونه‌وانه‌دا باس له هه‌ڵبژاردنی پێشوه‌خته‌ی ئه‌نجومه‌نی نوێنه‌رانی عیراق کرا به‌جۆرێک ببێته‌ده‌رفه‌تێک بۆ چاره‌سه‌ری قه‌یرانی حوکمڕانی و تێپه‌ڕاندنی ئه‌م دۆخه نه‌خوازراوه‌ی ئێستا و گه‌راندنه‌وه‌ی متمانه‌ی خه‌ڵک به سندوقه‌کانی ده‌نگدان.
هه‌ر سه‌باره‌ت به‌و سه‌ردانه وته‌بێژی سه‌رۆک کۆماری عیراق ئاماژه‌ی به‌وه‌کرد که کۆبوونه‌وه‌کان له که‌شێکی دۆستانه‌دا به‌ڕێوه‌چوون و تیایاندا باس له میکانیزمی چاره‌سه‌ری کێشه‌کان کرا به‌گوێره‌ی ده‌ستور و به‌رژه‌وه‌ندی هاوبه‌شی سه‌رجه‌م پێکهاته‌کانی عیراق به‌پشتبه‌ستن به دیالۆگ و لێکگه‌یشتن .
حه‌سه‌ن جیهاد باسی له‌وه‌ش کرد که سه‌رۆک کۆمار سه‌ردانی به‌ڕێزان مامۆستا سه‌لاحه‌دین به‌هائه‌دین و مامۆستا عه‌لی باپیر و مه‌کته‌بی سیاسی یه‌کێتی و پارتی کرد له‌و دیدارانه باس له پێویستی هێنانه‌دی یه‌کریزی نیشتمانی و چاره‌سه‌ری ناکۆکیه‌کان و یه‌کخستنی هه‌ڵوێستی لایه‌نه‌کان کرا بۆ رووبه‌روبوونه‌وه‌ی ئه‌گه‌رو پێشهاته‌کان .
