قائیمقامی سلێمانی: کاری ليژنەکانمان دوای جەژنيش بەردەوام دەبێت

SNN

قائيمقاميەتی سلێمانی رايگەياند: “لە پێناو تەندروستی هاوڵاتیان کاری لیژنەکان بۆ رۆژانی دوای مانگی ڕەمەزان زیاتر چڕ دەبێتەوە“.

ئاوات محەمەد قائيمقامی سلێمانی لە لێدوانێکيدا بە SNNی راگەياند: “شانازی بەوەوە ناکەین کە بڕیاری داخستنی شوێنێک بدەین بەڵکو داخستنی شوێنێک قورسترین بڕیارە بەڵام لە پێناو پاراستنی تەندروستی هەمووان ئەو بڕیارانە دەدەین و ئامانجمان ئەوەیە لە کۆتای ساڵدا ئامارێک ڕابگەیەنین کە کەمترین سەرپێچی تۆمار کرابێت”.

وتيشی “زۆرینەی شوێنەكان پابەندنی رێنماییەكانن ئەوەی پابەند نییە كەمینەن، بۆیە ھاووڵاتیان دڵنیا دەکەینەوە رێگە بەخواردنی بەسەرچوو زیانبەخش نادەین بگاتە سەر سفرەو خوانەکانیان و کاری لیژنە هابەشەکان بۆ دوای مانگی ڕەمەزانیش بەمجۆرە و زیاتریش بەردوام و دەستکراوە دەبن”.

دەشڵێت “شوێن هەبووە دەستخۆشیمان لێ کردووە بۆ  جێبەجێ کردنی رێنمایەکان بەڵام دوای دوو رۆژ لیژنەکان سەردانی کردوون و سەرپێچیان لێ بینیوە شوێنەکەیان داخستووە”.

ئاماژەی بەوەشکرد “هەر کەسێک یان بازرگانێک دەزانێت غەدری لێکراوە لەسەر داخستنی شوێنەکە ئەوادەتوانێت لە دادگا سکاڵا تۆمار بکات، چونکە قورسترین بڕیار سزادانی شوێنەكان و داخستنیانە، بەڵام ناكرێت ژیان و تەندروستی هاوڵاتیان بكەوێتە مەترسیەوە”.

هاوکات ڕونیشيکردەوە “لە چوار مانگی سەرەتای ئەمساڵدا و پێش مانگی پیرۆزی ڕەمەزان لیژنەهابەشەکان توانیویانە22 هەزار و  696 سەردانی بکەن و لەو ژمارەیە دوو هەزار و  718پسولەی سەرپێچی کراوە و 210 شوێن داخراوە و 20شوێنیش دراوەتە دادگا”.

باسی لەوەشکرد: “هەر لەو ماوەيەدا 191 تەن خواردنی ئیکسپایەر لەناوبراوە، بەڵام لەم مانگەدا بەهۆی ئەوەی خواست زۆر لەسەر خواردنی جۆراوجۆر بۆیە دەسەڵاتێکی زیاتر دراوەتە لیژنەکان بۆ چاودێری کردن و بەدواداچونی بازاڕ و مارکێت و شوێنەکان دیارە چاودێری کردن و بەسە کردنەوەکان بۆ دوای مانگی ڕەمەزانیش بەردەوامی دەبێت”.