ئیسرائیل: هیچ سەربازێکمان نەچوەتە ناو کەرتی غەزەوە

SNN

دوای ئەوەی بەرەبەیانی ئەمڕۆ سوپای ئیسرائیل رایگەیاند: هێرشی ئاسمانی و زەمینیان بۆ سەر کەرتی غەزە دەستپێکردوە، بەڵام دواتر رەتیکردەوە سەربازانی چووبنە ئەو ناوچەیەوە.

هاوکات لەگەڵ کۆکردنەوەی تانک و هێزی زەمینی ئیسرائیل لەسەر سنوری غەزە، سوپای ئەو وڵاتە بەرەبەیانی رۆژی هەینی لە تویتێکدا رایگەیاند: هێرشی ئاسمانی و زەمینیان بۆ سەر کەرتی غەزە دەستپێکردوە و وتەبێژی سوپای ئیسرائیلیش لە لێدوانێکدا بۆ فرانس پرێس هێرشە زەمینیەکەی پشتڕاست کردەوە.

دوو کاتژمێر دواتر سوپای ئیسرائیل رایگەیاند: هیچ سەربازێکیان نەچوەتە ناو خاکی غەزەوە و ئەوەی بڵاوکراوەتەوە هەڵە بووە.

زیادبوونی جموجۆڵە سەربازیەکانی ئیسرائیل لە سەر سنوری غەزە و ئەگەری هێرشی زەمینی بۆ سەر ئەو ناوچەیە دوای ئەوەهات، کە بزوتنەوەی حەماس موشەکێکی بە ناوی عیاش 250 نمایش کرد، کە باس لەوەدەکات ئامانجەکانی لە مەودای 250 کیلۆمەتری دەپێکێت و بەو موشەکە هێرشی کردوەتە سەر فرۆکەخانە ئیلات لە باشوری ئیسرائیل.

لە بۆردومانەکانی رۆژانی رابردووی ئیسرائیل بۆ سەر کەرتی غەزە زیاتر لە 100 فەلەستینی کوژراون و ئیسرائیلیش رایگەیاندوە موشکبارانەکانی حەماس و جیهادی ئیسلامی کوژرانی حەوت هاوڵاتی ئیسرائیلی لێکەوتوەتەوە.