پێنج وەزيری حکومەتی عێراق دەگۆڕدرێن

SNN

بەرپرسێکی رەوتی حيکمە رايگەياند: “مستەفا کازمی سەرۆک وەزیری عێراق بەمنزیکانە نیازی ئەنجامدانی گۆڕانکاریی وزاریی هەیەو بۆئەو مەبەستەش دەیەوێت پێنج لەوەزیرانی کابینەکەی بگۆڕێت”.

ڕەحیم عەبدودی ئەندامی دەستەی گشتیی ڕەوتی حیکمە کە عەمار حەکيم سەرۆکايەتی دەکات، لەلێدوانێکی ڕۆژنامەوانیدا رایگەیاند: “مستەفا کازمی سەرۆک وەزیرانی عێراق بڕیاریداوە هەریەک لەوەزیرەکانی دارایی، تەندروستیی، کشتوکاڵ، پیشەسازیی ‌و بازرگانیی بگۆڕێت، داواکاری گۆڕینیان ڕەوانەی یەکەم دانیشتنی ئەنجوومەنی نوێنەران دەکات لەدوای جەژنی ڕەمەزان”.

باسی لەوەشکرد: “پێدەچێت گۆڕینی ئەو وەزیرانە بەدووجار ئەنجامبدرێت، بەشێوەیەک سەرەتا وەزیرانی تەندروستیی (دەستلەکارکێشاوە) و کشتوکاڵ ‌و پیشەسازیی بگۆڕدرێن‌و دواتر گۆڕانکارییەکە هەریەک لەوەزیرانی دارایی‌ و بازرگانی بگرێتەوە”.

ڕەحیم عەبدودی وتيشی “ئەو گۆڕاکارییە وزارییە لەسەر پێشنیازی کوتلەی سائیرونی سەر بەموقتەدا سەدرو بەپشتیوانی سەرۆک وەزیران دەکرێت، ئەو جوڵەیە لەچوارچێوەی ئامادەکارییەکانی پرۆسەی هەڵبژاردن‌و ئامادەکارییە بۆ دەستنیشانکردنی کابینەی داهاتووی حکوومەت”.

رونيشيکردەوە: “بەشێک لەلایەنە سیاسییەکان لەئێستاوە لەنێوان خۆیاندا باس لەدیاریکردنی ناوی سێ سەرۆکایەتییەکان‌ و کاندیدانی پۆستە وزارییەکان دەکەن، گۆڕانکارییەکەی حکومەت ڕەهەندێکی سیاسیی‌و هەڵبژاردنی هەیە”.

ئەوەشی وتووە، “لایەنە سیاسییەکان لەسەر کاتی گرێدانی کۆبوونەوەی ئەنجوومەنی نوێنەران بۆ دەنگدان لەسەر گۆڕانکارییە وزارییەکە ناکۆن، بەشێوەیەک بەشێک لەکوتلەکان سوورن لەسەرئەوەی پێش دەستلەکارکێشانەوەی وەزیری دارایی لێرسینەوەی لەگەڵدا بکرێت، لەکاتێکدا بەشێکی تریان پێیانوایە لەجیاتی سازکردنی دانیشتنی لێپرسینەوە لەوەزیری دارایی، واباشترە دەنگ بەدەستلەکارکێشانەوەی بدرێت”.