هاتووچۆی هەولێر لەبارەی هێرشی ژنێک بۆ سەر کارمەندێکیان روونکردنەوە دەدات
SNN
هاتووچۆی هەولێر لە بارەی هێرشی ژنێک بۆ سەر کارمەندێکیان روونکردنەوە دەدات و تیایدا رایگەیاندوە: “بەپێی یاسای هاتووچۆ سزای دەستدرێژی کردنە سەر کارمەندی هاتووچۆ بەندکردنە”.
لە روونکردنەوەکەی بەڕێوەبەرایەتی هاتووچۆی هەولێردا هاتووە: “شۆفێرێکی ژن دوای ئەوەی بە هۆی بەکارهێنانی موبایلەوە ئاگای لە ئاماژەی دەستی کارمەندێکی هاتووچۆ نابێت و بە هۆیەوە قەرەباڵغی دروست بووە، لە کاتی لێپرسینەوە لەو سەرپێچییە، رووبەڕووی کارمەندەکە بووەتەوە”.
راشیگەیاندوە: “ئەو ژنە سەرەتا هەڕەشەی لە کارمەندەکەی هاتووچۆ کردوە بەوەی ئەگەر سەرپێچییەکە نەسڕێتەوە دەزگاکانی راگەیاندن دەباتە ئەو شوێنە، بەڵام بە هۆی ئەوەی کارمەندەکە هەڕەشەکانی پشتگوێ خستووە بە دەست و بە شەق هێرشی کردوەتە سەر ئەو کارمەندەی هاتووچۆ”.
ئاشکراشی کردووە: “کارمەندەکەی هاتووچۆ سکاڵای یاسایی لەسەر شۆفێرەکە تۆمارکردووە و بابەتی دەستدرێژی کردنە سەرکارمەندی هاتووچۆش لەیاسای هاتووچۆی ژمارە 86 سزایەکی قورسی داناوە بۆئەو حاڵەتە کە بەندکردنە”.
لە کۆتاییشدا رایگەیاندوە: “وەکو هاتووچۆی هەولێر پشتگیری ئەفسەر وکارمەندانی خۆمان دەکەین بەهەمو شێوەیەک کاتێک ڕووبەڕووی توندووتیژی و قسەی ناشرین دەبنەوە بەهۆی بەجێگەیاندنی ئەرکی خۆیان”.
روونکردنەوەکەی هاتووچۆی هەولێر دوای ئەوە دێت، رۆژی پێنج شەممە گرتەی ڤیدیۆیی ئەو رووداوە بڵاوکرایەوە، رووداوەکەش کاردانەوە و ناڕەزایەتی زۆری بەدوای خۆیدا هێنا.
