نەتانیاهو: ئەرکی سەرۆکی نوێی مۆساد رێگریکردنە لە چەکی ئەتۆمی ئێران

SNN

بنیامین نەتانیاهو رایگەیاند سەرۆکی نوێی هەواڵگری و ئۆپراسیۆنە تایبەتەکانی ئیسرائیل (مۆساد) لەم مانگەدا دەستبەکاردەبێت و ئەرکی باڵای ئەو رێگریکردن دەبێت لە ئێران تا دەستی بە چەکی ئەتۆمی بگات.

لە رێورەسمێکدا کە بۆ ماڵئاواییکردن لە یوسی هۆکین سەرۆکی پێشووی مۆساد و دەستبەکاربوونی داڤید (دیدی) بارنیع سەرۆکی نوێی ئەو دەزگایە رێکخرابوو، نەتانیاهو وتی: “لە هەر بارودۆخێکدا، تەنانەت ئەگەر لایەنەکان لەسەر پرسی ناوەکی گەیشتنە رێککەوتن لەگەل ئێران، ئێمە رێگری لە ئێران دەکەین چەکی ئەتۆمی بەدەستبهێنێت، فشارەکانیشمان کاریگەرییان لەسەر گفتوگۆکانی ناوەکی هەیە”.

نەتانیاهو وتیشی: “دۆستایەتیمان لەگەڵ ئەمریکا زۆر بەنرخە، ئەوان چەندین ساڵ پشتیوانمان بوون. بەڵام ئەم پرسە پەیوەندی بە ئااسایشی نیشتمانی ئیسرائیلەوە هەیە و ئامانجی گەورەمانە کە نەهێڵین مەلاکان گەلی جولەکە لەسەر زەوی بسڕنەوە کە بە هەزاران ساڵە ماونەرەوە، دەبێت لەوبارەیەوە بڕیاری بوێرانە و سەربەخۆیانە بدەین”.

ئەمە لەکاتێکدایە بە نێوەندگری ژمارەیەک وڵاتی ئەوروپا، ئەمریکا لەگەڵ ئێران لە گفتوگۆدایە بۆ زیندووکردنەوەی رێککەوتنی ناوەکی و ئیسرائیلیش چەندین جار داوای لە ئەمریکا کردووە نەگەڕێتەوە بۆ رێککەوتن.