یەکشەممە، لیستی نوێی مووچە رادەگەیەنرێت و هەفتەی داهاتوو سەرجەم وەزارەتەکان تەواودەبێت

SNN-عەلی حەمە سەعید

دوای ئەوەی بەهۆی نەبووی سیولەی نەقدی دابەشكردنی مووچەی فەرمانبەران بە بەراورد بە مانگی پێشوو چەند ڕۆژێك لە وادەی خۆیدا دواكەوت، بەڵام ئەمڕۆ پارەی پێویست بۆ مووچەی سەرجەم وەزارەتەكان دابینكراو ڕۆژی یەكشەممەش لیستێكی نوێ ڕادەگەیەندرێت كە تیایدا وادەی دابەشكردنی مووچەی سەرجەم وەزارەتەكان بڵاودەكرێتەوە.

بە گویرەی ئەو زانیارییانەی كە لەبەرپرسێكی باڵا لە وەزارەتی دارایی بە SNN، دراون ئەمڕۆ پێنج شەممە كۆتایی هێندرا بە گرفتی كەمی سیولەی نەقدی لە بانكەكانی تایبەت بە دابەشكردنی مووچەی فەرمانبەران، بۆ ئەومەبەستەش ئەو خشتەیەی كە دوێنێ‌ ڕاگەیەندرا تا رۆژی یەكشەممە كاری پێدەكرێت.

ئاماژەی بەوەشكرد، ڕۆژی یەكشەممە داهاتوو لیستێكی نوێی مووچە ڕادەگەیەندرێت كە وادەی دابەشكردنی مووچەی سەرجەم وەزارەتەكانی تیادا دیاریكراوە بەجۆرێك كەمتر لە هەفتەیەكدا مووچەی سەرجەم وەزارەتەمان دابەشدەكرێت.

ئەو بەرپرسەی وەزارەتی دارایی ئەوەشی خستەڕوو، لەم مانگەدا هەر لە بنەڕەتدا گرفتی نەبوونی پارەنەبوو بەڵكوو ئەوەی گرفت بوو نەبوونی سیولەبوو لە بانكەكاندا، بۆیە ئەمڕۆ توانیمان ئەو گرفتە چارەسەر بكەین و هەفتەی داهاتوو كۆتایی بە دابەشكردنی مووچە بهێنین.

بە گوێرەی بەدواداچوونەكانی SNN دروستكردنی گرفت لەبەردەم دابەشكردنی مووچەی فەرمانبەران بۆ مەبەستی لە بیربردنەوەی داواكاری مووچەخۆران بوو بۆ ئەوەی واز لە داواكاری كۆتایی هێنان بە لێبڕینی لە%21 مووچە بهێنن.