ئەمریکا سیستمێکی بەرگری مووشەکی دیکە لە بەغدا خستەکار

SNN

سەرچاوەیەکی ئەمنی عێراق رایگەیاند لە باڵیۆزخانەی ئەمریکا لە بەغدا سیستمی بەرگری مووشەکی جۆری C_RAMی خراوەتەکار.

ئەو سەرچاوە ئەمنییە بە میدیاکانی عێراقی وتووە کە سیستمەکە تاقیکراوەتەوە و هاووڵاتییانی چەند گەڕەکێکی نزیک لە باڵیۆزخانەکە وەک کەرادە و جادریە دەنگی تاقیکردنەوەی  سیستمەکەیان بیستووە.

سیستمی C_RAM ئەمریکی دەتوانێت ئەو مووشەکانە بخاتەخوارەوە کە ئاڕاستەی ناوچەکە دەکرێت ئەوەش لەرێگەی تەقاندنەوەی لە ئاسمانی سێ هەزار و 500 مەتردا.

ناوچەی سەوز کە باڵیۆزخانەی ئەمرییکای لێیە لەگەڵ ژمارەیەک بنکەی هێزەکانی ئەمریکا لە عێراق بەردەوام دووچاری هێرشی مووشەکی و درۆن دەکەونەوە و ئەمریکاش بەشێک لە گروپەکانی حەشدی شەعبی لە پشت ئەو هێرشانە ناودەبات.

لە ئێستادا پێنتاگۆن پلانی هێرشکردنەسەر چەکدارانی حەشدی شەعبی لە عێراق هەیە و بۆ ئەو مەبەستەش داوای لە بایدن کردووە رەزامەندی نیشانبدات.