جەبار یاوەر لە بارەی ئاڵوگۆڕ لە پۆستی ئەمینداری گشتیی وەزارەتی پێشمەرگە روونکردنەوە دەدات

SNN

جەبار یاوەر ئەمینداری گشتیی وەزارەتی پێشمەرگە رەتیدەکاتەوە لە بارەی ئاڵوگۆڕ لە پۆستەکەی هیچ شتێکی رەسمییان پێگەیشتبێت و جەختیش دەکاتەوە، کە هەر فەرمانێک لەو بارەوە بدرێت جێبەجێی دەکات.

دوابەدوای بڵاوبوونەوەی چەند هەواڵێک لە بارەی دانانی رێباز بیرکۆتی سەرۆکی فراکسیۆنی یەکێتی لە ئەنجومەنی پارێزگای هەولێر لە پۆستی ئەمینداری گشتی، جەبار یاوەر لە روونکردنەوەیەکدا باسی لەوەکردوە: “تائێستا بە فەرمی ئەمینداری گشتیی وەزارەتی پێشمەرگەین و نە بەشێوەی زارەکی و نە هیچ نوسراوێکی فەرمی نەگەیشتوەتە وەزارەتی پێشمەرگە بۆ ئاڵوگۆڕ لە پایەی ئەمینداری گشتیی”.

راشیگەیاندوە: “وەک پێشمەرگەیەکی دێرینی یەکێتی و وەک فەرمانبەرێکی حکومەت هەر فەرمانێک لە سەرۆکایەتی هەرێم و حکومەت و حزبەکەم کە نوێنەرایەتی دەکەم لە پایەی ئەمینداری گشتیی وەزارەتی پێشمەرگە دەیخەمە سەر سەرم و جێبەجێی دەکەم”. هەروەک جەخیشیکردوەتەوە: “لای بەندە پلە و کورسی ئەمینداریەتی گشتی ئەرک و سزمەتە، نەوەکو ناو و ئیمتیاز”.

لە کۆتاییشدا وێڕای ئەوەی رێباز بیرکوتی بە پیاوێکی ماندونەناس و هاوڕێ و هەڤاڵێکی خۆی ناوبردووە، رایگەیاندوە: ” هەر کاتێک بە فەرمی پۆستی ئەمینداریەتی گشتیی وەزارەتی پێشمەرگە بە رێباز بیرکوتی سپێردرا وەک ئەندامێکی حزبی و فەرمانبەرێکی حکومی فەرمان جێبەجێ دەکەم”.