لە بودجەی ساڵی داهاتووی ئەمریکا داوای 522 ملیۆن دۆلار بۆ شەڕی داعش دەکرێت
سوپای ئەمریکا لە عێراق
SNN
وەزارەتی بەرگری ئەمریکا داوایکردووە لە بودجەی ساڵی 2022ی ئەمریکا بڕی 522 ملیۆن دۆلار تەرخانبکرێت بۆ بەردەوامیدان بە شەڕی دژ بە داعش لە عێراق و سوریا.
پێنتاگۆن بەشێوەیەکی گشتی داوای 715 ملیار دۆلاری کردووە بۆ تەواوی خەرجییەکانی وەزارەتەکە، لەو بڕەش داوایکردووە 522 ملیۆن دۆلاری تایبەت بکرێت بە مەشق و راهێنان و پڕچەککردنی هێزەکان لە عێراق و هێزەکانی سوریای دیموکرات و چەند گروپ و دەستەیەکی دیکەی نزیک لە ئەمریکا لە سوریا وەک گروپی چەکداری مەغاویرلسەورە کە لە باشووری رۆژهەڵاتی سوریادا چالاکن.
بە دیاریکراویش داوایکردووە 345 ملیۆن دۆلار بۆ پشتیوانیکردن لە هێزە ئەمنییەکانی عێراق تەرخانبخرێت و ئەوەی دیکە بۆ پشتگیری لە هێزەکانی سوریا بێت کە شانبەشانی هێزە ئەمریکییەکان لەو وڵاتە دژ بە داعش دەجەنگن.
پێنتاگۆن ئاماژەی بەوەکردووە: “پشتیوانیکردن لەم هێزانە کاریگەری بنچینەیی لەسەر بنیادنانی توانای هێزەکان دەبێت و بارودۆخێک دەڕەخسێنێت کە سەقامگیرییەکی درێژخایەن لەو ناوچانەدا بەرجەستەبێت”.
ئەمە لەکاتێکدایە ئەمریکا لە چوارچێوەی پشتیوانییەکانیدا بۆ هێزە عێراقییەکانی سوریا، پشتیوانی هێزی پێشمەرگە دەکات و مووچەی دوو لیوای هاوبەشی پێشمەرگەش دابیندەکات.
