بەرهەم ساڵح پێشوازی لە شاندی باڵای هەرێم کرد

SNN

ئەمڕۆ سێشەممە بەرهەم ساڵح، سەرۆککۆماری عێراق، لە کۆشکی سەلام لە بەغدا پێشوازیکرد لە شاندی باڵای حکومەتی هەرێمی کوردستان بە سەرۆکایەتی قوباد تاڵەبانی، جێگری سەرۆکی حکومەتی هەرێم.

لە دیدارەکەدا بەگرنگییەوە باس لە بەھێزکردنی ھەماھەنگی و هاریکاری بونیادنەر لە نێوان حکومەتی فیدرال و حکومەتی هەرێمی کوردستان لە سەرجەم بوارەکان کرا، لە پێناو چەسپاندنی ئاسایش و ئارامی وڵات و یەکلایکردنەوەی کێشە هەڵپەسێردراوە داراییەکان و جێبەجێکردنی پابەندییەکان لە یاسای بودجەی گشتی و زامنکردنی مافی هاووڵاتیان و مووچەخۆران و باشکردن و ھێنانەدی داواکارییە رەواکانی خەڵک بەگوێرەی دەستوور.

ھەر لە دیدارەکەدا سەرۆک کۆمار رایگەیاند، چارەسەرکردنی کێشەکان لە رێگەی لێکتێگەشتن و دیالۆگی جددی و خواستی هاوبەش دێتەدی بە ئاڕاستەی ھێنانەدی بەرژەوەندی هاووڵاتیان، ھاوکات ئاماژەشیکرد بەگرنگی یەکلایکردنەوەی دۆسییە هەڵپەسێردراوەکان، بەتایبەتی بابەتی بودجەی گشتی بە گوێرەی دەستوور و یاسا و پاراستنی مافی ھاووڵاتیانی عێراق و ھەرێمی کوردستان و مووچەخۆران و خانەنشینانی هەرێمی کوردستان بێ جیاوازی.

لە بەشێکی دیکەی دیدارەکەدا گفتوگۆکرا دەربارەی پێشهاتەکانی دۆخی سیاسی و ئابووری و یەکخستنی هەوڵەکان بۆ ریشەکێشکردنی پاشماوەکانی داعش کە مەرامیانە ئارامی ھەندێک ناوچە تێکبدەن.