توێژینەوەیەک: ئەمریکا 100 بۆمبی ئەتۆمی لە ئەوروپا و تورکیا هەیە

SNN

توێژینەیەک کە لە ئەڵمانیا ئەنجامدراوە، ئاماژە بەوە دەکات: “ئەمریكا 100 بۆمبی ئەتۆمی لە بنكە سەربازییەكانی لە ئەورووپا و توركیا هەڵگرتووە”.

پەیمانگای ئاشتی و سیاسەتی ئەمنی لە زانكۆی هامبورگی ئەڵمانیای توێژینەوەیەکی بڵاوکردوەتەوە، کە تیایدا هاتووە: “سوپای ئەمریكا لە بنكەی بیوخل لە هەرێمی راینلاند بڤالتسی رۆژئاوای ئەڵمانیادا 20 بۆمبی ئەتۆمی هەیە”.

ئاماژەی بەوەشکردوە: “سوپای ئەمریكا لە بنكەی كلاینیێ برۆگل لە بەلجیكا 20 بۆمبی ئەتۆمی، لە بنكەی ڤۆلكل لە هۆڵەندا 20 بۆمب، هەمان ژمارەش لە هەردوو بنکەی ئاڤیانۆ و گیدی تۆری ئیتالیا و 20 بۆمبی ئەتۆمیشی لە بنکەی ئەنجەرلیکی تورکیا هەڵگرتووە”.

تا ئێستا بەرپرسانی حكوومەتی ئەڵمانیا هیچ هەڵوێست و راگەیەندراوێكیان لەبارەی ناوەرۆکی توێژینەوەکە و بوونی بۆمبی ئەتۆمی ئەمریكا لەسەر خاكی وڵاتەكەیان نەبووە.

پێشتر چەندین جار پارتە ئۆپۆزسیۆنەكانی ئەڵمانیا داوایان کردبوو، ئەمریكا بۆمبە ئەتۆمیەكانی لەسەر خاكی ئەڵمانیا بكێشێتەوە.