لێبوردنی نێودەوڵەتی داوای ئاشکراکردنی 643 رفێنراوی فەلووجە دەکات
SNN
رێکخراوی لێبوردنی نێودەوڵەتی داوا لە حکومەتی عێراق دەکات چارەنووسی 643 هاووڵاتی سوننەی دانیشتووی فەلووجە دیاریبکەن، کە پێنج ساڵ پێش ئێستا لە لایەن ژمارەیەک چەکدارەوە رفێنران.
لەپێنجەم ساڵیادی رفاندن و بێسەرووشوێنکردنی ژمارەیەک هاووڵاتی سوننە لە فەلووجە رێکخراوی لێبوردنی نێودەوڵەتی رایگەیاندوە: “لە 3ی حوزەیرانی 2016 لە رێگەی ژمارەیەک بارهەڵگرەوە هەزار و 300 کەس لە فەلووجە رفێنران و تائێستاش چارەنووسی 643 کەسیان دیار نییە”.
وەک رێکخراوەکە باسی لێکردوە ئەو هاووڵاتیانە لە لایەن حەشدی شەعبییەوە رفێنراون و داواشی لە حکومەتی عێراق کردووە، چارەنوسیان ئاشکرا بکات.
هەرچی حەشدی شەعبییە چەندین جار بێبەریبوونی خۆی لە رفاندن و بێسەروشوێنکردنی ئەو هاووڵاتیانە راگەیاندوە.
