سۆمۆ: تائێستا هەرێم هیچ بڕە نەوتێکی رادەست نەکردووە

SNN

به‌ڕێوه‌به‌ری كۆمپانیای نیشتمانی به‌بازاڕكردنی نه‌وتی عێراق (سۆمۆ) رایگه‌یاند، تائێستا هه‌رێمی كوردستان پابه‌ند نه‌بوه‌ به‌ هه‌نارده‌كردنی نه‌وت له‌ ڕێگه‌ی كۆمپانیاكه‌یانه‌وه.

عه‌لا یاسری، به‌ڕێوه‌به‌ری كۆمپانیای سۆمۆ رایگەیاند: “هه‌نارده‌ی نه‌وتی عێراق له‌ ئێستادا دوو ملیۆن 900 هەزار به‌رمیلی له‌ رۆژێكدا تێپه‌ڕاندوه‌، لەو بڕە دوو ملیۆن و 800هەزار بەرمیلی لە بەندەرەکانی باشور و 100هەزار بەرمیلیشی نەوتی کەرکوکە و لە رێگەی بەندەری جەیهانی تورکیاوە هەناردە دەکرێت.

راشیگەیاند: “پێشبینی ده‌كه‌ین له‌ چه‌ند مانگی داهاتودا دوای ئاساییبوونەوەی چالاکی بازرگانی و ئابوری جیهانی، نرخی نه‌وت زیاتر به‌رزببێته‌وه‌”.

سه‌باره‌ت بە نه‌وتی هه‌رێمی كوردستانیش، عه‌لا یاسری وتویەتی: “یاسای بودجه‌ی فیدڕاڵی بۆ ساڵی دارایی 2021 مامه‌ڵه‌ له‌گه‌ڵ هه‌رێمی كوردستان ده‌كات له‌سه‌ر نه‌وت، به‌ڵام تائێستا هه‌رێمی كوردستان پابه‌ند نه‌بوه‌ راده‌ستكردنی نه‌وت و هەناردەکردنی لە رێگەی سۆمۆوه‌”.

بەپێی یاسای بودجەی عێراق پێویستە حکومەتی هەرێم رۆژانە داهاتی 250 هەزار بەرمیل و نیوەی داهاتی دەروازە سنوورییەکان رادەستی بەغدا بکات و بەرپرسانی حکومەتی هەرێمیش چەندین جار ئامادەیی خۆیان بۆ پابەندبوون بە بڕگەکانی یاسای بودجە دووپاتکردوەتەوە.