لە هەولێر فەرمانی دەستگیرکردن بۆ رێبوار کەریم وەلی دەرچوو

SNN

بە تۆمەتی خراپ بەکارهێنانی ئامێرەکانی پەیوەندیکردن بە بڕیاری دادگای لێکۆڵینەوەی هەولێر فەرمانی دەستگیرکردن بۆ رۆژنامەنووس رێبوار کەریم وەلی دەرچوو.

لە نوسراوێکدا دادگای لێكۆڵینەوەی هەولێر فەرمانی دەستگیركردنی بۆ رۆژنامەنوس رێبوار كەریم وەلی دەركردوە و لە نوسراوەکەدا هاتوە: “كەسێك بەناوی رێبوار كەریم وەلی بابەتێكی بڵاوكردوەتەوە لە تۆڕی كۆمەڵایەتی فەیسبوك و هانی خەڵكی دەدات بۆ شكاندنی قەدەغەی هاتوچۆ، تۆمەتبار دەستگیربكرێت بەپێی مادەی (2)ی خراپ بەكارهێنانی پەیوەندیكردن”.

بەپێی نوسراوێکیش کە واژۆی دادوەر عیماد فارس رەشید، دادوەری دادگای لێكۆڵینەوەی هەولێری لەسەرە و 17ی ئایاریی ئەمساڵ دەرچوە و ئاڕاستەی سەندیکای رۆژنامەنوسانی کوردستان کراوە، تیایدا هاتوە، “پێویستە زانیاری تەواومان بۆ رەوانە بکەن دەربارەی تۆمەتبار رێبوار کەریم وەلی، ئەگەر ئەندامی سەندیکاکەتانە وێنەیەک لە ناسنامەی و بەڵگەنامە کەسییەکانی تۆمەتباری ناوبراومان بۆ رەوانە بکەن”.

دەرچوونی فەرمانی گرتنی ئەو رۆژنامونووسە لە کاتێکدایە کە لەماوەی رابردوودا پەسەندکردنی بڕیاری سەپاندنی شەش ساڵ زیندان بە سەر پێنج رۆژنامەنووس و چالاکوانی بادینان لەسەر ئاستی ناوخۆ و دەرەوەی کوردستان ناڕەزایەتی زۆری لێکەوتەوە و بە هەوڵێک بۆ بەرتەسککردنەوەی ئازادی رادەربڕین لێکدرایەوە.

رێبوار کەریم وەلی، کە پێشتر لە چەند دەزگایەکی راگەیاندنی نزیک لە پارتی کاری کردووە، ئێستا لە دەرەوەی وڵاتە، لە ماوەکانی رابردوودا چەند جارێک رەخنەی لە سیاسەتەکانی ئەو حزبە گرتبوو.