بافڵ تاڵەبانی و جینین پلاسخارت کۆبوونەوە
بافڵ تاڵەبانی و جینین پلاسخارت، فۆتۆ: SNN
SNN
بافڵ تاڵەبانی، هاوسەرۆکی یەکێتیی نیشتمانیی کوردستان لەگەڵ جینین پلاسخارت، نوێنەری تایبەتی سکرتێری گشتی نەتەوە یەکگرتووەکان لە عێراق کۆبووەوە.
لە کۆبوونەوەکەدا بافڵ تاڵەبانی هەڵوێست و بۆچوونی یەکێتی لەبارەی کۆی پرسەکان خستەڕوو و رایگەیاند، ئێمە لەگەڵ هەماهەنگی و لێکتێگەیشتنی نێوان هێز و لایەنە کوردستانییەکانین و دەبێت هەموومان پێکەوە قەوارەی هەرێم بپارێزین. بەشدار و هاوبەشی راستەقینە بین بۆ بەڕێوەبردن و بڕیاردان لەسەر پرسە چارەنووسسازەکان. پێشوازی لە هەر هەوڵێکی نێودەوڵەتیش دەکەین کە ئامانج لێی پێشخستنی ئەزموونی هەرێمی کوردستان بێت.
سەبارەت بە ھەڵبژاردنەکانی عێراق هاوسەرۆکی یەکێتی جەختی لە ئەنجامدانی ھەڵبژاردنێکی پاک و بێگەرد کردەوە و داوایکرد نەتەوە یەکگرتووەکان رۆڵێکی گرنگ و کارا ببین لەچاودێریکردنی پرۆسەکە و سەرخستنی ئەزموونی دیموکراسی لە وڵاتەکە.
پێکەوەژیان و یەکترقبوڵکردن تەوەرێکی تری کۆبوونەوەکە بوو و هەردوولا هاوڕابوون لەسەر بووژاندنەوەی گیانی تەبایی لەنێوان سەرجەم نەتەوە و پێکهاتەکان و رایانگەیاند، هەموو رەنگ و دەنگە جیاوازەکان دەتوانن پێکەوە وڵاتێکی ئارام و سەقامگیر بونیادبنێن و هەمووان پێکەوە لەپێناو بەرژەوەندییە گشتییەکاندا کاربکەن.
