بافڵ تاڵەبانی لەگەڵ سەرۆکی هاوپەیمانی عەزم کۆبووەوە

SNN

وەفدی یەکێتی بە سەرۆکایەتی بافڵ تاڵەبانی لە بەغدا لەگەڵ خەمیس خەنجەر، سەرۆکی ھاوپەیمانی عەزم و سەرکردەی دیاری سوننەکان کۆبووەوە.

لەدیدارێکدا کە بەشێک لە ئەندامانی مەکتەبی سیاسی و سەرکردایەتی ئامادەبوون، بەربەستەکانی بەردەم پرۆسەی سیاسی، ئابووری و ئەمنی لە ھەرێم و عێراق تاوتوێکران و بۆچوونیان لەبارەوە ئاڵوگۆڕکرا. هەردوولا جەختیان لە بەھێزکردن و پتەوکردنی پەیوەندی نێوان ھەموو لایەن و نەتەوە و پێکھاتەکان کردەوە لەپێناو چارەسەری ریشەیی کێشەکانی نێوان ھەرێم و عێراق.

بافڵ تاڵەبانی بڕیار و ستراتیژی یەکێتی خستەڕوو و وتی: “یەکێتی لەگەڵ زمانی دیالۆگ و لێکتێگەیشتن هەیە و پێشوازی لە هەر هەوڵێکیش دەکات کە گیانی تەبایی و پێکەوەژیان زیندووبکاتەوە و بڕوای بە کاری هاوبەش هەبێت”.

هەڵبژاردنەکانی داهاتووی عێراق تەوەرێکی تری کۆبوونەکەوە بوو و وەفدی یەکێتی هەڵوێستی یەکێتییان خستەڕوو و رایانگەیاند: “یەکێتی لەگەڵ بەڕێوەچوونی هەڵبژاردنە لە وادەی خۆی و ئەمەشمان بە هەموو لایەنەکان راگەیاندووە. پێویستە هەڵبژاردنێکی پاک و بێگەرد بەچاودێری کۆمەڵگای نێودەوڵەتی بەڕێوەبچێت و دووربێت لە هەموو دەستتێوەردانێک”.