دەیان هەڵسوڕاوی گۆڕان لە هەولێر دەستیان لەکارکێشایەوە
SNN
دەیان هەڵسوڕاوی گۆڕان لە هەولێر دەستیان لەکارکێشایەوە و هۆکاری ئەو بڕیارەیان بۆ ئەوە دەگێڕنەوە، کە بزوتنەوەکە بە هۆی بەشداری لە حکومەت بووەتە مایەی نائومێدکردنی خەڵک و سەرباری بوونی گەندەڵی بەردەوامە لە مانەوەی لە حکومەت.
لە نامەی دەستلەکارکێشانەوەی 65 هەڵسوڕاوی بزوتنەوەی گۆڕان لە هەولێر هاتووە: ” دوای کۆچی دوایی کاک نەوشیروان، بڕیاڕبەدەستانی گۆڕان بە بەرنامە دەیانەوێ گۆڕان لەسەر ڕێچکە ڕاستەکەی خۆی لابەرن، بیکەن بە دوکانی سیاسی کۆمپانیا”.
روونیشیان کردوەتەوە: “لە سەرەتادا سەرەڕای رەخنە و ئاگادارکردنەوەکانی جەماوەر و کادیرە دڵسۆزەکانی و بەشێک لەسەرکردایەتیەکەی، کەوا بەشدار نەبن لەم حکومەتە فاسید و گەندەڵە و لەبەرەی خەڵکدا بمێننەوە، بەڵام سەرەڕای ئەوانە گوێیان نەگرت و بە بیانووی ئەنجامدانی چاکسازیەکی درۆینە چوونە بەرەی گەندڵکارانەوە و ئەو هەموو جەماوەر و کادیرە دڵسۆزەیان بە گۆڕانەوە نەهێشت”.
جەختیشیان کردوەتەوە: “بزوتنەوەی گۆڕان لەحکومەت بەشدارە و شەرعیەتی بە دەسەڵاتی جێبەجێکاری داوە خۆی کرد بە شەریکی 30 ساڵ دزی و گەندەڵی، سەرەڕای بەشداریکردنی گۆڕان بۆ چاکسازی و چاکردنی دۆخی خەڵک، بەڵام بەداخەوە بەشێکی بەرپرسانی حزبی حکومی گۆڕان بێ دەنگن لە ئاست ئەو هەموو گەندەڵیەی دەکرێت لەبەر چاویان”.
راشیانگەیاندووە: لە 30 ساڵی رابردوودا هیچ هێزێک نەیتوانیوە “بەقەد گۆڕان خەڵک نائومێد بکات”.
تائێستا بزوتنەوەی گۆڕان بە فەرمی لە بارەی دەستلەکارکێشانەوەی ئەو هەڵسوڕاوانەی هیچ لێدوان و راگەیەنراوێکی نەبووە.
