بافڵ تاڵەبانی: یەکێتی پەرۆشی لێکتێگەیشتنی ھاوبەشە لەنێوان ھێزە کاریگەرەکان
SNN
بافڵ تاڵەبانی، ھاوسەرۆکی یەکێتیی نیشتمانیی کوردستان لەگەڵ حەیدەر عەبادی، سەرۆکی هاوپەیمانی نەسر کۆبووەوە و گفتوگۆیان لەبارەی هەڵبژاردنی عێراقەوە کرد.
لەکۆبوونەوەکەدا گفتوگۆ لەبارەی پرسە سیاسی و ئەمنییەکانەوە کرا و هەردوولا راشکاوانە هەڵوێستی خۆیان لەبارەی هەڵبژاردنەکانی داهاتووی عێراقەوە خستەروو. ھاوسەرۆکی یەکێتی چارەسەری سیاسییانە و ئاشتییانەی بۆ چارەسەرکردنی کێشە سیاسییەکانی نێوان ھەرێم و عێراق و ھێزە کوردی و عێراقییەکان دووپاتکردەوە.
روونیکردەوە: یەکێتی پەرۆشی لێکتێگەیشتنی ھاوبەشە لەنێوان ھێزە کاریگەرەکان، چونکە باوەڕی نەگۆڕمان بە سازان و گفتوگۆ ھەیە لەسەر کۆی پرسەکان و تەنھا لەرێگای دیالۆگ و بنەما دەستوورییەکان دەتوانین رێکبکەوین و زاڵبین بەسەر ناکۆکی و گرفتەکان. دەبێت وڵات لەم دۆخە پڕ لەکێشمەکێش و ململانێیە رزگاربکەین و نەھێڵین چیتر خەڵک و گەلەکەمان ببنە قوربانی ململانێ سیاسییەکان.
لەبارەی هەڵبژاردنەکانی داهاتووی عێراقەوە بافڵ تاڵەبانی هەڵوێستی یەکێتی روونکردەوە و وتی، دەبێت هەڵبژاردن لە وادەی خۆیدا بەشێوەیەکی پاک و بێگەرد بەڕێوەبچێت و چاودێرانی نێودەوڵەتیش رۆڵێکی گرنگیان لە چاودێریکردنی دۆخەکەدا هەبێت.
ھەر لەکۆبوونەوەکەدا ھاوسەرۆک راشکاوانە ئاماژەی بە مەترسی و ھەڕەشە جدییەکانی سەر پرۆسەی سیاسی لە ھەرێم و عێراق کرد و روونیکردەوە، یەکێتی بەھەموو شێوەیەک دژی ھەر ھەوڵێک دەوەستێتەوە کە سەقامگیری سیاسی، ئەمنی و ئابووری ھەرێم و عێراق تێکبدات و رایگەیاند، ھەموو خەمێکمان روو لەڕەوینەوەی کێشەکان و دووبارە بونیادنانەوەی متمانەیە لەنێوان هێز و لایەنەکان و سەرجەم نەتەوە و پێکهاتەکان.
