هێرشێکی موشەکی بۆ سەر بنکەی ئاسمانی بەلەد پوچەڵکرایەوە

SNN

شانەی راگەیاندنی ئەمنیی عێراق ئاشکرای کرد: “هێرشێکی موشەکی بۆ سەر بنکەی ئاسمانی بەلەد لە پارێزگای سەڵاحەدین پوچەڵکراوەتەوە”.

بەپێی راگەیەندراوێکی شانەی ئەمنی: “هێزە ئەمنییەکان لە کێڵگەیەکی ناوچەی زەنبور لە سنووری پارێزگای دیالە دەستیان بە سەر چوار سەکۆی تایبەت بە هەڵدانی موشەک و چوار موشەکی کاتیۆشادا گرتووە”.

راشیگەیاندووە: ” موشەکەکان ئامادەکرابوون بۆ ئەوەی ئاراستەی بنکەی ئاسمانی بەلەد لە پارێزگای سەڵاحەدین بکرێن”.

رۆژی چوارشەممەی رابردووش چەند موشەکێک ئاراستەی بنکەی ئاسمانی بەلەد کرابوون، کە ژمارەیەک لە هێزەکانی ئەمریکا و هاوپەیمانانی تێدایە و بە فڕۆکەی بێفڕۆکەوانیش هێرشکرابوە بنکەیەکی هێزەکانی ئەمریکا و هاوپەیمان لە فرۆکەخانەی نێودەوڵەتی بەغدا.

زیاتر لە ساڵێکە هێرشەکانی سەر بنکە سەربازی و نێردە دیپلۆماسییەکانی ئەمریکا و هاوپەیمانان لە عێراق چڕبوونەتەوە.