ژنێکی نیپاڵی خۆی خنکاند و تەرمی ژنێکش بە شێوێنراوی دۆزرایەوە

SNN

لە شاری سلێمانی ژنێکی نیپاڵی خۆی خنکاند و تەرمی ژنێکیش دۆزرایەوە کە ئاسەواری فیشەکی پێوەبووە و دواتر تەرمەکە شێوینراوە.

محەمەد هەژار سەرۆکی سەندیکای کرێکارانی بیانی بە SNNراگەیاند: ” ژنێکی نیپاڵی کە تەمەنی 35 ساڵە و نزیکەی پێنج ساڵ بووە لە هەریمی کوردستان ژیاوە، خۆی خنکاندووە”.

وتیشی: “ئەو ژنە هاوسەرەی هەیە و لەئێستادا تەرمەکەی لە پزیشکی دادیی سلێمانییە و لێکۆڵینەوە لەو رووداوە دەستیپێکردووە”.

لە لایەکی ترەوە سەرچاوەیەک لە سەنتەری فریاکەوتنی خێرای سلێمانی بە SNNراگەیاند: دوێنی تەرمی ژنێک لە ناوچەی عەزیزئاوا لە سلێمانی دۆزراوەتەوە کە تەمنی لە نێوان 30 بۆ 35 ساڵدایە.

وتیشی: تەرمەکە ئاسەواری زیاتر لە سێ فیشەکی پێوەبووە و دوای ئەوەی کوژراوە، تەرمەکە سوتێنراوە.

لە ماوەی ئەم هەفتەیەدا ئەمە سێهەم حاڵەتی کوشتنی ژنانە لە سلێمانی، دوای ئەوەی تەرمی ژنێک لە یەکێک لە گۆڕستانەکانی شارەکە دۆزرایەوە و لە گەڕەکی بەکرەجۆش ژنێک لە لایەن هاوسەرەکەیەوە بە فیشەک کوژرابوو.

بەپێی ئامارە فەرمییەکانی بەڕێوەبەرایەتی گشتیی بەرەنگاربوونەوەی توندوتیژی دژی ژنان و خێزان لە هەریمی کوردستان، لە ماوەی چوار مانگی سەرەتای ئەمساڵدا لانیکەم چوار ژن کوژراون.

هەر بە گوێرەی ئەو ئامارە لەو ماوەیەدا  26 ژن خۆیان کوشتووە، 38 ژن سوتاون یان خۆیان سوتاندووە، ژمارەی حاڵەتەکانی دەستدرێژی و گێچەڵی سێکسیش 37 حاڵەت بوون و سێ هەزار و 867 سکاڵای پەیوەست بە توندوتیژی دژی ژنان و خێزانیش تۆمارکراون.