حکومەتی عێراق زیانلێکەوتووانی کەمپی شاریا قەرەبوو دەکاتەوە

SNN

وەزیری کۆچ و کۆچبەرانی عێراقی رایگەیاند: “بەبڕی نیو ملیۆن دینار قەرەبووی زیانلێکەوتووانی ئاگرەکەی کامپی شاریای دهۆك دەکەنەوە”.
ئیڤان فایەق، وەزیری کۆچ و کۆچبەرانی عێراق لە راگەیەندراوێکدا باسی لەوەکردووە: “136 خێزانی ئاوارەی دانیشتووی کەمپی شاریا هەر یەکیان بە بڕی 500 هەزار دینار قەرەبوو دەکرێنەوە”.

راشیگەیاندوە: “بەهەماهەنگی لەگەڵ سەرجەم لایەنەکان بەدواداچوون بۆ کەسانی شایستە کراوە”.
وەزیری کۆچ و کۆچبەرانی عێراق ئاماژەی بەوەشکردووە: “پرۆسەی دابەشکردنەکە لەلایەن لیژنەیەکی هاوبەشەوە لە هەریەك لە نوسینگەی سەرۆکوەزیرانی عێراق و بەرێوەبەری بەشی پارێزگاکانی ناوەڕاست و شانەی ئەمنی بەهەماهەنگی لەگەڵ کارگێری کامپکە بەرێوەدەچێت”.
رۆژی چواری حوزەیران ئاگر لە کامپی ئاوارەکانی شنگال لە کۆمەڵگەی شاریا لە قەزای سێمێلی سەر بە پارێزگای دهۆک کەوتەوە، بەهۆی ئاگرەکەشەوە شەش کەس برینداربوون، زیاتر لە 300چادر سوتان.