ئیسڕائیل: بۆردومانی شوێنە سەربازییەکانی کەرتی غەزەمان کردووە
SNN
سوپای ئیسڕائیل رایگەیاند: “فڕۆکە سەربازییەکانی وڵاتەکە بۆردومانی شوێنە سەربازییەکانی کەرتی غەزەیان کردووە، ئەوەش وەکو وەڵامێک بۆ هەڵدانی باڵۆنی گڕدار لە کەرتی غەزەوە بۆ کێڵگەکانی باشووری ئیسڕائیل”.
سوپای ئیسڕائیل لە بەیاننامەیەکدا بڵاويکردەوە: “ئامادەین بۆ سەرجەم سیناریۆکان بە نوێکردنەوەی شەڕ و پێکدادانەکانیشەوە، ئەوەش بەمەبەستی رووبەڕووبوونەوەی بەردەوامبوونی ئەو کارە تیرۆریستییانەی کە لە غەزەوە دەکرێن.”
دوای شەڕ و پێکدادانەکانی مانگی رابردووی نێوان ئیسڕائیل و گروپە چەکدارییەکانی کەرتی غەزە کە 11 رۆژی خایاند و دواتر بە نێوەندگری میسڕ شەڕ و پێکدادانەکان راگیران، ئەمە یەکەمین جارە ئیسڕائیل و چەکدارانی غەزە هێرش بکەنەوە سەر یەکتر.
ئەم هێرشانەش دوای ئەوە دێن ئیسڕائیلیە نەتەوەپەرستەکان لە ئۆرشەلیمی رۆژهەڵات رێپێوانێکیان ئەنجامدا کە ئەوەش بووە هۆی توڕەبوونی فەڵەستینیەکان.
