قائيمقاميەتی سلێمانی: تەلارە بازرگانییەکان ناچار دەکرێن درەخت بڕوێنن

SNN

قائیمقامیەتی سلێمانی رايگەياند: “رێکاری یاسایی دەگرينەبەر و تەواوی باڵەخانەو تەلارە بازرگانییەکان ناچار دەکەين بەپێی روبەری بەردەم باڵەخانەکان درەخت بڕوێنن”.

ئەندازیاری تەلارساز گوڵان کامیل سەرۆکی لیژنەی پاراستنی شوێنەوار لە لیژنە هاوبەشەکانی قائیمقامیەتی سلێمانی رایگەیاند: “تێبینی دەکرێت لەکاتی دروستکردنەوە یان نۆژەنکردنەوەی خانوو و باڵەخانەکانی شەقامی تویمەلیک بەشێکی زۆری درەخت و باخچەکان وشک دەکرێن یان دەبڕدرێنەوە هەربۆیە بە فەرمانی قائیمقامی سلێمانی هەڵمەتێکمان دەستپێکردووە بۆ گرتنەبەری رێکاری پێویست و یاسایی، بۆ ئەو مەبەستە لە ماوەی چەند رۆژی رابردوودا پسوڵەی سەرپێچیمان داوە بە خاوەنی ئەو باڵەخانانەی کە درەختیان نەڕواندووە و بەردەمی بیناکانیان کردووە بە کۆنکرێت یان بیهارتۆن، لەکاتی پابەندنەبونیان دەدرێن بە دادگا”.

وتیشی “بەشێکی ئەو درەخت و باخچانەی لە شەقامی توی مەلیک دەبینران وشککراون یان بڕدراونەتەوە، بۆیە رێکاری یاسایی دەگرنەبەر بەرامبەر ئەنجامدەرانی ئەو کارانە”.

سەرۆکی لیژنەی پاراستنی شوێنەوار ئاماژەی بەوەش کرد: “ئەو سەوزاییانەی تەنها بۆ جوانکاری روێنراون جێگای درەخت ناگرنەوەو دەبێت بەپێی رێنمایی درەختێک بڕوێنرێت کە باڵای هەبێت و ئەگەری وشکبوونی کەمبێت”.