قوباد تاڵەبانی : هەموو هەوڵێکمان دەخەینە گەڕ بۆ دەستگیرکردنی بکوژانی ژنان
قوباد تاڵه‌بانى، جێگرى سه‌رۆكى حكومه‌تى هه‌رێم | فۆتۆ: SNN
SNN
جێگری سەرۆکی حکومەتی هەرێم رایگەیاند: “بەتوندی ڕووبەڕووى توندوتیژی دژى ژنان دەوەستمەوە” و “هەموو هەوڵەکانیشمان بۆ دەستگیرکردنی بکوژانی ژنان دەخەینەگەڕ”.
قوباد تاڵەبانی جێگری سەرۆکی حکومەتی هەرێمی کوردستان رایگەیاند: “هەوڵەکانی پۆلیسی پارێزگاى سلێمانی و چاوکراوەییان بەرز دەنرخێنم و دەستخۆشییان لێ دەکەم بۆ ئاشكراكردن و دەستگیرکردنی ئەو تۆمەتبارەی کە تاوانێکی دڕندانەی بەرامبەر ژنێک ئەنجام دابوو لەگۆڕستانی سەیوان لەشارى سلێمانی”.
راشیگەیاندوە: ئەمە بە دەرفەت دەزانم بۆ ئەوەی دووپاتی بکەمەوە کە بەتوندی ڕووبەڕووى توندوتیژی دژى ژنان دەوەستمەوە. وەک چۆن پێشتریش لەچەندین بۆنەدا باسمکردوە، هەموو هەوڵێکمان دەخەینە گەڕ بۆ دەستگیرکردنی بکوژانی ژنان و رووبەڕووکردنەوەیان لەگەڵ یاسا”.
ئەمەش دوای ئەوە دێت کە ئەمڕۆ پۆلیسی سلێمانی رایگەیاندبوو: “مەفرەزەکانی پۆلیسی پارێزگای سلێمانی – بنکەی پۆلیسی سەیوان بەھاوکاری بەشی پۆلیسی فریاکەوتن ئەو تۆمەتبارەیان دەستگیرکرد کە چەند ڕۆژێک لەمەوبەر ژنێکی لەگۆڕستانی سەیوان خنکاندبوو دواتر تەرمەکەی بەجێھێشتبوو”.
