15 هەزار كرێكاری بیانی لە هەرێم كاردەكەن

SNN-عەلی حەمە سەعید

بەرپرسێكی وەزارەتی كارو كاروباری كۆمەڵایەتی هەرێم رايگەياند: “بە بەراورد بە ساڵی رابردوو ئەمساڵ كەمترین مۆڵەتمان بە كرێكاری بیانی داوە بۆ كاركردن لە هەرێمی كوردستان ئەوەش لە پێناو رەخساندنی هەلیكاری زیاتر بۆ كرێكار و هاووڵاتیانی ناوخۆی هەرێم، بەڵام سەرەڕای ئەوەش لە ئێستادا 15 هەزار هاووڵاتی بیانی وەك كرێكار لە هەرێمی كوردستان كار دەكەن”.

عارف حیتۆ، بەڕێوەبەری گشتی كار و دەستەبەری كۆمەڵایەتی لە وەزارەتی كاروكاروباری كۆمەڵایەتی بەSNNی راگەیاند: “ئێمە لە وەزارەتی كار پلانی تایبەت بەخۆمانمان هەیە بۆ هێنانی كرێكاری بیانی و رەخساندنی هەلیكار بۆیان ئەوەش لە رێگەی ئەو كۆمپانیایانەی كە تایبەتمەندن بە هێنانی كرێكاری بیانی، لە ئێستاشدا لە هەرێمی كوردستان 15 هەزار هاووڵاتی بیانی مۆڵەتی كاركردنیان پێدراوە لە سێكتەرە جیاوازەكاندا”.

ئاماژەی بەوەشكرد: “بڵاوبوونەوەی ڤایرۆسی كۆرۆنا و داخستنی فڕۆكەخانەكان و بەردەوامی تونكردنەوەی رێكارەكانی تایبەت بەڕووبڕووبوونەوەی ڤایرۆسی كۆرۆنا هۆكار بوون بۆ ئەوەی بە بەراورد بە چەند ساڵی رابردوو هێنانی كرێكاری بیانی بۆ هەرێمی كوردستان كەمیكردووە بەجۆرێك تەنها لە ساڵی رابردوودا سێ‌ هەزار و 600 كرێكار هێندراونەتە هەرێمی كوردستانەوە بەڵام بۆ ئەمساڵ هێشتا هیچ ئامارێكی وردمان لەبەردەستدا نییە”.

ئەو بەرپرسەی وەزارەتی كارو كاروباری كۆمەڵایەتی ئەوەشی خستەڕوو: “ئەو كرێكارانەی كە دەهێندرێنە هەرێمی كوردستان یاخود لە ئێستادا مۆڵەتی كاركردنیان پێدراوە بەشێكی زۆریان كرێكاری پیشەیی یان خاوەن بڕوانامەن و لەگەڵ كۆمپانیاكان هاتوونەتە كوردستان، ئەوە سەرەڕای ئەوەی ژمارەیەك كرێكاری بیانیش وەك خزمەتكار لە ماڵان كار دەكەن”.