ئێران: دانوستانەکانی ڤییەنا لە رێککەوتن نزیکبوونەتەوە

SNN

نوێنەری ئێران لە دانوستانەکانی ڤییەننا بۆ بە گەڕخستنەوەی رێککەوتنی ئەتۆمی ساڵی 2015 دەڵێت: “دەقی کۆتایی رێککەوتن ئامادەیە و پێویستە بۆ راوێژ نوێنەرانی بەشدار لە دانوستانەکە بگەڕێنەوە بۆ وڵاتەکەیان”.

عەباس عێراقچی، نوێنەری ئێران لە دانوستانەکانی ڤییەنا رۆژی یەکشەممە لە کۆتا رۆژی گەڕی شەشەمی دانوستانەکان وتی: “دەتوانم بڵێم دەقی کۆتایی دانوستانەکە و سەرجەم بەڵگەکان ئامادەبوون”.

وتیشی: “ئێستا لە هەمووکاتێک زیاتر نزیکبوونەوە لە رێککەوتن و زۆر بابەتی جێی ناکۆکی چارەسەر کراون”.

ئەوەشی خستەڕوو، لە ئێستادا نۆرەی لایەنی بەرامبەرە، کە هەڵوێستی خۆی نیشان بدات و بڕیاری کۆتایی بدات، ئەمەش وەک ئاماژەیەک بە ئەمریکا و ئەو وڵاتانەی لە رێککەوتنەکەدا ماونەتەوە.

عێراقچی راشیگەیاند: دوای دانوستانێکی چڕ لەگەڕی شەشەمدا، پێویستە تیمە دانوستانکارەکان بگەڕێنەوە بۆ وڵاتەکانیان بە مەبەستی راوێژ و یەکلاکردنەوەی کۆتا بڕیاریان.

ماوەی نزیکەی دوو مانگە دانوستانی چڕ لە نێوان نوێنەرانی ئێران و نوێنەرانی ئەو وڵاتانەی لە رێککەوتنی ئەتۆمیدا ماونەتەوە بەڕێوەدەچێت و ئەمریکاش کە ساڵی 2018 لە رێککەوتنەکە کشاوەتەوە، ناڕاستەوخۆ بەشدارە لەو دانوستانانە.

ئامانج لە دانوستانەکان ئەوەیە ئەمریکا بگەڕێتەوە بۆ رێککەوتنەکە و بەشیک لە سزاکانی لەسەر ئێران هەڵبگرێت، لەبەرامبەریشدا تاران کۆتایی بە هەڵپەساردنی پابەندبوونەکانی بەو رێککەوتنە بهێنێت.