سەرۆکوەزیرانی ئیسرائیل: ئیدارەی ئەمریکا دەبێت بەخەبەربێت

SNN

سەرۆکوەزیرانی نوێی ئیسرائیل لە یەکەم کۆبوونەوەی کابینەکەیدا رایگەیاند “دەبێت ئیدارەی بایدن و هاوپەیمانە نێودەوڵەتییەکانی بەخەبەربێن و بیرێکی دیکە بکەنەوە لە رێککەوتنی ناوەکی ئێران و مەترسییەکانی”.

نەفتالی بێنێت، سەرۆکوەزیرانی ئیسرائیل رایگەیاند: “هەڵبژاردنەکەی ئێران ئاماژەبوو بۆ ئەوەی ئەمریکا و لایەنەکان لەسەر پرسی رێککەوتنی ناوەکی ئێران پەلەنەکەن، هەڵبژاردنی ئیبراهیم رەئیسی بەسەرۆک نیشانەی ئەوەبوو کە دەبێت وڵاتانی زلهێز بەخەبەربێنەوە”.

وتیشی: “دەبێت لایەنەکان تێبگەن لەوەی کە کار لەگەڵ کێ دەکەن و خوازیارن کە پەیوەندییەکانیان لەگەڵ چ جۆرە رژێمێکدا بەهێزبکەن”.

لە چەند رۆژی رابردوودا ئیبراهیم رەئیسی وەک سەرۆکی نوێی ئێران هەڵبژێردرا، لەبارەی هەڵبژاردنی رەئیسییەوە نازم دەبا‌غ نوێنەری حکومەتی هەرێم لە ئێران وتوویەتی: “پێشبینی ناکرێت سیاسەتەکانی ئێران لەدوای رەئیسی بگۆڕێت”.

ئەمریکا و ئێران لە ڤیەنا دانوستانەکانیان لەسەر پرسی ئەتۆمی بەردەوامە و بەگوێرەی بەرپرسانی ئەمریکا، واشنتن خوازیارە لەپێش سوێندخواردنی سەرۆکی نوێی ئێران کە دەکەوێتە مانگی ئابەوە، لەبارەی پرسی ئەتۆمییەوە بگەنە رێککەوتنێک.