بەڕێوەچوونی یاسای چاکسازی لە پەرلەمان تاوتوێ دەکرێت

SNN-عەلی حەمە سەعید

سەرۆكی لیژنەی دەستپاكی لە پەرلەمانی كوردستان ئاشكرایكرد ئەمڕۆ لە لیژنەكەماندا میوانداری هەریەكە لە سكرتێری لیژنەی باڵای چاكسازی و سەرۆكی دەستەی دەستپاكی هەرێمی كوردستان دەكەین، لە كۆبوونەوەكەدا باس لە هۆكارەكانی جێبەجێكردنی بڕگە گرنگەكانی یاسای چاكسازی و ئاستەنگەکانی بەردەم بە سستی جێبەجێكردنی یاسای چاكسازی دەكەین و دواتر بەڕاپۆرتێك تێبینییەكان ئاراستەی لایەنی پەیوەندیدار دەكەین.

شیرین ئەمین، سەرۆكی لیژنەی دەستپاكی لە پەرلەمانی كوردستان بە SNNی ڕاگەیاند: ئەمڕۆ لە لیژنەكەماندا میوانداری هەریەكە لە ( عەبدولحەكیم خەسرەو) سكرتێری لیژنەی باڵای چاكسازی و ( ئەنوەر ئەحمەد) سەرۆكی دەستەی دەستپاكی هەرێم دەكەین، ئەوەش بە مەبەستی وەرگرتنی زانیاری لەبارەی هۆكارەكانی بە سیستی بەڕێوەچوونی جێبەجێكردنی خاڵ و بڕگە و مادەكانی یاسای چاكسازی.

ئاماژەی بەوەشكرد، ئەوەی لە ئێستادا بووەتە جێگای باس چ لای ئێمەی پەرلەمانتاران و چ لای هاووڵاتیان و تەنانەت بەشێك لە بەرپرسانی باڵای حكومەت ئەوەیە كە تا ئێستا نەتواندراوە یاسای چاكسازی وەك خۆی جیبەجێبكرێت لە كاتێكدا واخەریكە ساڵێك بەسەر جێبەجێكردنی ئەو یاسایەدا تێدەپەڕێت و بەڵام بە كردار هیچ شتێكی ئەو تۆمان نەبینیوە جگە لەوەی لەلایەن هەندێك لە وەزارەتەكانەوە هەندێك ڕێنمایی دەركراون بۆ جێبەجێكردنی ئەو یاسایە بەڵام دواجار ئەو ڕێنماییانەش جیبەجێ‌ نەكراون.

سەرۆكی لیژنەی دەستپاكی لە پەرلەمانی كوردستان ئەوەشی خستەڕوو، دوای خستنەڕووی تێبینی و سەرنجەكانمان لەبارەی هۆكارەكانی جیبەجێنەكردنی خاڵە گرنگەكانی یاسای چاكسازی و دواتر وەرگرتنەوەی وەڵام لەلایەن ئەو كەسانەی كە میوانداریمان كردوون، ڕاپۆرتێكی ورد لەوبارەیەوە ئامادە دەكەین كە تیایدا بە خاڵ باس لە هۆكارەكانی جێبەجێنەكردنی یاسای چاكسازی دەكەین و ئەو ڕاپۆرتە ئاراستەی دەستەی سەرۆكایەتی پەرلەمان و ئەنجومەنی وەزیران و وەزارەتە پەیوەندیدارەكان دەكەین.