سعوديە: کەمکردنەوەی هێزەکانی ئەمريکا کارناکاتە سەر توانای بەرگريمان

SNN

هاوپەیمانێتی سەربازی بە رابەرایەتی سعودیە رایگەیاند: “کەمکردنەوەی هێزەکانی ئەمریکا لە سعودیە کارناکاتە سەر توانای بەرگری وڵاتەکە”، ئەوەش دوای ئەوەی بەرپەرچی کۆمەڵێک فڕۆکەی بێ فڕۆکەوانی بۆمبڕێژکراوی حوسییەکانی دایەوە کە بە ئاڕاستەی سعودیە هەڵدران.

تورکی مالکی وتەبێژی هاوپەیمانێتیەکە رايگەياند: “کەمکردنەوەی هێزەکانی ئەمريکا کاریگەریی لەسەر بەرگریی ئاسمانی سعودیە نابێت، لە یەک تێگەیشتنێکی باش هەیە لەگەڵ هاوپەیمانەکانماندا سەبارەت بە هەڕەشەکان لە ناوچەکەدا، توانای بەرگریکردنمان هەیە لە وڵاتی خۆمان.”

مالکی رۆژی شەممە رايگەياند: ” بەرگری ئاسمانی سعودیە بەرپەرچی 17 فڕۆکەی بێ فڕۆکەوانی حوسییەکانی داوەتەوە، کە ئەمەش لە سەرەتای دەستپێکردنی ململانێکانەوە زۆرترین فڕۆکەی بێ فڕۆکەوانە لە تەنها یەک رۆژدا هەڵبدرێت”.

ئەم بڕیارەی ئەمریکا لە کاتێکدایە ئيدارەی جۆ بايدن سەرۆکی ئەمەریکا هەوڵی هێورکردنەوەی گرژییەکان دەدات لەگەڵ ئێراندا، ئەوەش دوای ئەوەی لە ماوەی سەرۆکایەتی ترەمپدا هەڵمەتی ” قورسترین فشار ” خرایە سەر ئێران و بەوەش گرژییەکانی نێوان دوو وڵاتەکە زیادیکرد.

لە ساڵی 2015ەوە سعودیە رابەرایەتی هاوپەیمانێتیەکی سەربازی دەکات بۆ پشتیوانیکردن لە حکومەتی یەمەن و دژی حوسییەکانی یەمەن دەجەنگێت کە لە ساڵی 2014 وە سەنعای پایتەخت و کۆمەڵێک ناوچەی دیکەی یەمەنیان لەژێر دەستدایە.

سعودیە هەمیشە رووبەڕووی هێرشی موشەکی باڵیستیکی و فڕۆکەی بێ فڕۆکەوانی بۆمبڕێژکراو بۆتەوە کە لە یەمەنەوە بە ئاڕاستەی فڕۆکەخانە و دامەزراوە نەوتییەکانی سعودیە هەڵدەدرێن، هێزی سەربازی ئەو وڵاتەش موشەکی پاتریۆتی ئەمەریکا بەکاردەهێنێت بۆ بەرپەرچدانەوەی ئەو هێرشانە.

18ی ئەم مانگە ئەمریکا رایگەیاند: “ژمارەی سەرباز و سیستمە بەرگرییە ئاسمانییەکانی بۆ رۆژهەڵاتی ناوەڕاست لە سعودیە کەم دەکاتەوە، لەوانەش پاتری موشەکی پاتریۆت و سیستمی دژە موشەکی ساد”.