پرسی کوشتنی سەگە بێلانەکانی کەرکوک دەگەیەنرێتە حکومەتی عێراق
SNN
دوابەدوای بانگەوازەکەی دامەزراوەی ڤیم بۆ راگرتنی کوشتنی سەگی بێلانە لە کەرکوک، دوو ئەندامی کوردی پەرلەمانی عێراق بە فەرمی داوایان لە وەزارەتی تەندروستی و ژینگە کرد دەستوەردان لەو بابەتەدا بکات و ئەو کارە رابگرێت.
غالب محەمەد و سەرکەوت شەمسەدین دوو ئەندامی پەرلەمانی عێراق لە نوسراوێکدا کە ئاراستەی وەزارەتی تەندروستی و ژینگەیان کردووە، ناڕەزایەتیان بەرامبەر بە کوشتنی سەگی بێلانە لە کەرکوک دەربڕیوە، کە جگە لەوەی دیمەنێکی تۆقێنەری بە شەقام و کۆڵانەکانی شارەکە بەخشیوە و مەترسی بۆ سەر ژیانی هاوڵاتیان دروست کردووە، لە هەمان کاتدا بە کارەساتێکی ژینگەیی ناویان بردووە.
ئەو دوو پەرلەمانتارە داواشیان کردووە، وەزارەتی تەندروستی عێراق ئەو کارەی پارێزگاری بە وەکالەتی کەرکوک رابگرێت و رێگەچارەی گونجاو بۆ پرسی زۆربوونی سەگی بێلانە لە ناو کەرکوک بدۆزێتەوە.
ئەمەش لە کاتێکدایە پێشتر دامەزراوەی ڤیم رایگەیاندبوو: “بە فیشەک و بە شێوەیەکی دڕندانە، لەبەر چاوی منداڵ و پیر و گەنجدا، سەگە بێلانەکانی شاری کەرکوک دەکوژرێن، بە بیانووی زۆر بوونی سەگ لە ناو شاردا و بە بڕیاری پارێزگاری کەرکوک ئەم ڕێگا چارەیە دانراوە، لە کاتێکدا چارەسەری تر بەردەستە بۆ کۆنتڕۆڵکردنی ڕێژەی سەگەکان”.
راشیگەیاندبوو: “ئێمە لە دامەزراوەی ڤیم داوای دەستبەجێ ڕاگرتنی ئەم پرۆسە نامرۆڤانەیە دەکەین و ئامادەیی خۆمان دەردەبڕین بۆ هەر دەستپپێشخەرییەک، کە ببێتە هۆی ڕزگارکردنی سەرجەم ئەو ئاژەڵانەی بە ناهەق لەناودەبرێن”.
