وەرگەڕانی پاسێک گیانلەدەستدانی دوو رۆژنامەنووس و برینداربوونی 21 کەسی تری لێکەوتەوە
SNN
پاسێک کە سەرجەم سەرنشینانی رۆژنامەنووس بوون لە نزیک شاری نەغەدەی رۆژهەڵاتی کوردستان وەرگەڕا و بە هۆیەوە دوو خانمە پەیامنێر گیانیان لەدەستدا و 21 رۆژنامەنووسی دیکەش برینداربوون.
بەپێی هەواڵی میدیاکانی ئێران پاسێک لە ژمارەیەک رۆژنامەنووسی تیابووە، لە نزیک شاری نەغەدەی سەر بە پارێزگای ئازەربایجانی رۆژئاوا وەرگەڕاوە و بە هۆیەوە دوو خانمە پەیامنێری ئاژانسەکانی ئیرنا و ئیسنا بە ناوەکانی ریحانە یاسینی و مەهشید کەریی گیانیان لەدەستدا.
ئاماژەیان بەوەشکردووە، لەو رووداوەدا 21 رۆژنامەنووسی دیکە برینداربوون.
ئەو رۆژنامەنووسانە بە نیازبوون سەردانی دەریاچەی ورمێ بکەن، کە چەند ساڵێکە لەبەردەم مەترسی وشکبووندایە.
سەربارەت بەو رووداوە، حەسەن رۆحانی سەرۆککۆماری ئێران پەیامێکی ماتەمینی راگەیاندووە و وەزیری گواستنەوە و رێگاوبانی ئەو وڵاتەش داوای لێکۆڵینەوەی لە رووداوەکە کردووە.
