کۆمەڵەی خوێندکارانی کوردستان هەڵوێستی خۆی لەبارەی پرسیاری تاقیکردنەوەکان راگەیاند

SNN

کۆمەڵەی خوێندکارانی کوردستان لە راگەیەنراوێکدا کە ئاراستەی سەرۆکایەتی پەرلەمان، ئەنجومەنی وەزیران و وەزارەتی پەروەردەی کردووە، رایگەیاندوە: ” سێکتەری پەروەردەو فێرکردن، یەکێکە لە کۆڵەکە بنەڕەتییەکانی پێشکەوتنی کۆمەڵگەو، لەهەر کۆمەڵگەیەکدا ئەم پڕۆسەیە گرنگی تەواوی پێ نەدرێت و پشتگوێ بخرێت، کۆمەڵگەیەکی پاشکەوتوو، نەوەیەکی ناتەندروست و بێ سوود بەرهەم دێت”.

باسی لەوەشکردووە: “ساڵانە لەم پرۆسێسەدا هەڵەی کوشندەو بە پلان ڕوو دەدات، ئەمساڵیش لە پرسیاری کۆتا تاقیکردنەوەی پۆلی 9 ی بنەڕەتیدا، کە لە پڕۆگرامدا چوار شاعیری کورد وەکو مەنهەج خوێندراون، کە ئەوانیش (وەلی دێوانە، پیرەمێرد، حاجی قادری کۆیی و هەژار موکریانی)ین، بەڵام تەنها هەژار موکریانی 33 نمرەی لەسەر هاتوەتەوە”.

هەر لەو راگەیەنراوەدا هاتووە: ” داواکارین بەڕەچاوکردنی بارودۆخی نەخوازراوی خوێندن و خوێندکاران، بڕیاری (دخول عام) بدرێت و سەرجەم خوێندکارانی پۆڵی (12)ی ئامادەیی، بەشداربن لە تاقیکردنەوەی وزاری .”

دەقی راگەیەندراوەکەی کۆمەڵەی خوێندکارانی کوردستان

بەڕێزان / پەرلەمانی هەرێمی کوردستان

‎سەرۆکایەتی uەنجومەنی وەزیران

‎وەزارەتی پەروەردە

‎سڵاوی زانست و خەبات !

‎سێکتەری پەروەردەو فێرکردن، یەکێکە لە کۆڵەکە بنەڕەتییەکانی پێشکەوتنی کۆمەڵگەو، لەهەر کۆمەڵگەیەکدا ئەم پڕۆسەیە گرنگی تەواوی پێ نەدرێت و پشتگوێ بخرێت، کۆمەڵگەیەکی پاشکەوتوو، نەوەیەکی ناتەندروست و بێ سوود بەرهەم دێت .

‎ساڵانە لەم پرۆسێسەدا هەڵەی کوشندەو بە پلان ڕوو دەدات، ئەمساڵیش لە پرسیاری کۆتا تاقیکردنەوەی پۆلی (9) ی بنەڕەتیدا، کە لە پڕۆگرامدا (4) شاعیری کورد وەکو مەنهەج خوێندراون، کە ئەوانیش (وەلی دێوانە، پیرەمێرد، حاجی قادری کۆیی و هەژار موکریانی)ین، بەڵام تەنها هەژار موکریانی (33)نمرەی لەسەر هاتوەتەوە، بۆیە ئێمە لە (کۆمەڵەی خوێندکارانی کوردستان) پێمان وایە؛ سەرەڕای مەترسی دۆخی تەندروستی و خۆپارێزی لە ڤایرۆسی کۆڕۆناو، بێ کارەبایی و نەبوونی ئامێری فێنککەرەوەی گونجاو و تەواو لە ناوەندەکانی خوێندن و، بارودۆخی ناهەمواری خوێندکار لەڕووی داراییەوە، ئەم هەنگاوانە جگە لە بێ ئەرزش کردنی پرۆسەکەو قورسترکردنی باری سەرشانی خوێندکاران و شێواندنی مێژوو بۆ ئامانجێکی دیاری کراو هیچی تری لێ ناخوێندرێتەوە….بۆیە :

‎- داواکارین بەڕەچاوکردنی بارودۆخی نەخوازراوی خوێندن و خوێندکاران، بڕیاری (دخول عام) بدرێت و سەرجەم خوێندکارانی پۆڵی (12)ی ئامادەیی، بەشداربن لە تاقیکردنەوەی وزاری .

‎-هەرچی زووترە لیژنەیەک لەپەڕلەمان و وەزارەتی پەروەردە پێکبهێنرێت، بەمەبەستی چارەسەرکردنی کێشە کەڵەکەبووەکان و کێشەی ئاماژە بۆ کراو، سەرباری هەڵە دووبارەکان کە بەمەبەست دەیانەوێ زیان لە پرۆسەی خوێندن و خوێندکاران بدەن .

‎کۆمەڵەی خوێندکارانی کوردستان

‎مەکتەبی سکرتاریەت

‎ 24ی حوزەیرانی 2021