نرخی یەک بەرمیل نەوتی خاوی برێنت گەیشتە نزیکەی 76 دۆلار

SNN

نرخی نەوت لە بازاڕە جیهانیەکان بە بەرزی ماوەتەوە و نرخی یەک بەرمیل نەوتی خاوی برێنت ئەمڕۆ گەیشتە 75 دۆلار و 89 سەنت، ئەمەش بەرزترین نرخی تۆماارکراوە لەمساڵدا.

هاوکات نرخی یەک بەرمیل نەوتی خاوی ئەمریکیش بۆ 73 دۆلار و 77 سەنت بەرزبووەوە.

لەدوای بڵاوبوونەوەی کۆرۆنا و وەستانی چالاکیە ئابوری و بازرگانی و پیشەسازیەکان لە ساڵی 2020دا نرخی نەوت بۆ نزمترین ئاستی لە مێژوودا دابەزیبوو.

دوابەدوای بڕیارەکانی وڵاتانی ئۆپێک پڵەس بۆ کەمکردنەوەی ئاستی بەرهەمهێنان و هەناردەی نەوت، بازاڕی وزە جوڵەی تێکەوتبوەوە و دابەزینی ئامارەکانی تووشبوون بە کۆرۆنا و فراوانبوونی هەڵمەتەکانی کوتان بە ڤاکسینی ئەو پەتایە و ئاساییکردنەوەی ژیان و دەستپێکردنەوەی چالاکییە ئابوریەکانیش رۆڵیان لە بووژانەوەی نرخی نەوت هەبووە.