وەزارەتی بەرگری ئەمەریکا: نيگەرانين لە هێرشەکانی سەر سەربازە ئەمريکييەکان لە عێراق و سوريا

SNN

وەزارەتی بەرگری ئەمەریکا رايگەياند: “هەست بە نیگەرانییەکی زۆر دەکەين سەبارەت بە زنجیرە هێرشەکانی ئەمدواییانەی سەر سەربازە ئەمەریکییەکان لە عێراق و سوریادا”.

جۆن کێربی وتەبێژی وەزارەتی بەرگری ئەمەریکا لە کۆنفرانسێکی رۆژنامەنوسيدا رايگەياند: “هەست بە نيگەرانيەکی زۆر دەکەين سەبارەت بەو هێرشانە، ئەوان چەکی کوشندە بەکاردەهێنن، ئەوە هەڕەشەیەکی مەترسیدارە”.

دوای هێرشەکانی ئەمەریکا بۆ سەر سنووری نێوان عێراق و سوریا کە بووە هۆی کوژرانی چوار چەکدار، گروپە چەکدارییەکانی سەر بە ئێران بەڵێنیاندا تۆڵە بکەنەوە، لەلای خۆیەوە ئێران رەتیکردەوە دەستی هەبووبێت لە هێرشەکاندا بۆ سەر هێزەکانی ئەمەریکا لە عێراق و سوریا، هەروەها سەرکۆنەی هێرشەکانی ئەمەریکای کرد بۆ سەر گروپە چەکدارییەکانی سەر بە ئێران.

رۆژی چوارشەممە دیبلۆماتکاران و هێزەکانی ئەمەریکا لە عێراق و سوریا بە سێ هێرشی موشەکی و فڕۆکەیەکی بێ فڕۆکەوان کرانە ئامانج، هەر لەو رۆژەدا 14 رۆکێت لە بنکەیەکی ئاسمانی عێراق درا کە هێزەکانی ئەمەریکای تێدایە، لە ئەنجامیشدا دوو سەربازی ئەمەریکی برینداربوون.