وەزيری تەندروستی: پشکنينی ڤايرۆسی دێلتا لە هەرێم دابینکراوە

SNN

وەزيری تەندروستی رايگەياند: “پڕۆسەی پێدانی ڤاکسین بەرەوپێشچوونی بەخۆوە بینیوە، زیاتر لە 399 هەزار ژەمەڤاکسینی کۆرۆنا لەلایەن دانیشتوانی هەرێمی کوردستانەوە وەرگیراوە، لەوانە زیاتر لە 255 هەزار هاووڵاتی کە دەکاتە رێژەی لە %7.8 ژەمی یەکەم و زیاتر لە 144 هەزار هاووڵاتی کە دەکاتە رژەی لە %4.4 ژەمی دووەمی ڤاکسینیان وەرگرتووە”.

سامان بەرزنجی وەزيری تەندروستی هەرێم لە راگەيەندراوێکدا بڵاويکردەوە: “بۆیەکەمجارە لەلایەن وەزارەتی تەندروستی کیت و پێداویستی تایبەت بە دەستنیشانکردنی زنجیرەی نوێی ڤایرۆسی کۆرۆنای ناسراو بە (زنجیرەی دێڵتا) لە هەرێمی کوردستان دابینکرا”.

راشيگەياند: “پێشبینی هەڵکشانی سێیەم و ئەگەر و گومانی بڵاوبوونەوەی جۆر و زنجیرەی نوێی ڤایرۆسی کۆرۆنا دەکرێت، بەداخەوە جارێکی دیکە ژمارە و رێژەی تووشبووان و نووستن لە نەخۆشخانەکان بەهۆی ڤایرۆسی کۆڕۆنا زیادبووە و دووهێندی هەفتەکانی پێشووە”.

دەشڵێت “تکایە بەهەندی وەربگرن و رێکاری خۆپارێزی بگرنە بەر بە پۆشينی ماسک و دوورکەوتنەوەی کۆمەڵایەتی و قەرەباڵغی، ئاگاداری خۆتان و خانەوادە و منداڵەکانتان بن با هەموومان هاوکار و پاڵپشت بین و رێگەبگرین لە هەڵکشانی توندی نەخۆشیەکە و کوردستانمان بپارێزین”.

ئاماژەی بەوەشکردووە: “شوێنە گشتیەکان پێویستە پابەندی مەرجە تەندروستیەکان بن، وەزارەتی تەندروستی ئامادەکاری زیاتری رووبەرووبوونەوەی هەر هەڵکشانێکی نوێ دەکات”.