“هێرشی سەر بنکەکانی ئەمریکا لە عێراق زیاددەکات”
SNN
پەیمانگایەکی ئەمریکی پێشبینی کردووە هێرشی ملیشیاکان بۆ سەر بنکە سەربازییەکانی ئەمریکا لە عێراق زیادبکات و ئەمساڵ 50 هێرشی دیکە رووبدات.
پەیمانگای واشنتۆن بۆ توێژینەوەی رۆژهەڵاتی ناوەراست راپۆرتێکی لەبارەی هێرشە مووشەکییەکانی عێراق بڵاوکردووەتەوە کە بنکە سەربازییەکانی ئەمریکا دەکەنە ئامانج، لە راپۆرتەکەدا هاتووە “تا كۆتایی ئەمساڵ پێشبینی دەکرێت 50 هێرشی تر بكرێتە سەر بنكەكانی ئەمەریكا لە عێراق كە كوشتاریشی تێدا دەبێت، بەرامبەر بەمەش ئیدارەی بایدن شەش هێرشی تۆڵە ئامێز دژی میلیشیا عێراقییەكان ئەنجام دەدات”.
پەیمانگاكە دەڵێت: ئەمریکا هێزی سەربازی خۆی لە رۆژهەڵاتی ناوەڕاست كەمتر دەكاتەوە، بەڵام سەرباری ئەوەش ئەو هێرشانەی ئیدارەی بایدن بۆ تۆڵەكردنەوە دەیکەنەسەر نەیارەکانی زیاتر دەبن لەوانەی لە سەردەمی ترەمپ لە 2020 روویانداوە، بەڵام پێشبینی ناکرێت هێرشەکان یەکلاکەرەوە و کاریگەربن.
راپۆرتەكەی پەیمانگای واشنتۆن هانی بایدن و ئیدارەكەی دەدات تۆڵەكردنەوەكانیان بەهێزتر بكەن و راستەوخۆ فەرماندەكانی میلیشیاكان بكەنە ئامانج، هەروەها پەیامی راستەوخۆ بۆ ئێران بنێرن کە درۆن نەدەن بە گروپی چەكدار و ئەمە باشترە لەو تۆڵەكردنەوە دوور و تەمومژاوییانەی لەسوریا یان لەسنورەكانی عێراق و سوریا ڕوو دەدەن.
